၁။ နစ္စ = အကမျိုးစုံကိုယ်တိုင် 'က' တတ်ရပါမယ်။ သူတစ်ပါးကိုလည်းသင်ပြနိုင်ရမည်။
၂။ ၀ါဒန = အတီးအမှုတ်မျိုးစုံ တီးခတ်နိုင်ရမယ်။ ဒီအထဲမှာ ဂီတသီချင်းသီဆိုမှုလည်း အကျုံးဝင်ပါသည်။
၃။ ဝတ္တာလင်္ကာရ သန္ဓာန = လူတို့နှင့်သင့်လျော်အောင် အခါရာသီအလိုက် အ၀တ်တန်ဆာကို ဆင်ယင် ပေးမှု၊ ကိုယ်တိုင်လည်းဆင်ယင်တတ်မှု။
၎။ အနေကရူပ၀ိဘာဂ ကရဏ = ရုပ်နှင့်လိုက်အောင် အမှုန်းအခြယ် အပြင်အဆင် (အခုခေတ်အခေါ်တော့ မိတ်ကပ်ပေါ့)
၅။ သေယျတ္ထရဏာဘိသံယောဂပုပ္ဖါဒိဂန္ထရ = အိပ်ရာခုတင် စသည်တို့ကို တင့်တယ်အောင် စီရင်ခြင်း၊ ပန်းပွင့်ပန်းနွယ်များကို တင့်တယ်အောင်ပြုပြင်ခြင်း။
၆။ အနေကကီဠာရဉ္ဇန = လူအမျိုးအမျိုးတို့အား ကလူကျီစယ်ခြင်းဖြင့် နှစ်သက်စေမှု။
၇။ အနေကာသန သန္ဓာနရတိဇာနန = (ပြောပါရစေတော့...ဦးနှင့်ဆံနှင့်ကန်တော့ပါရဲ့) နေရာအမျိုးမျိုးတို့၌ နည်းအမျိုးအမျိုးဖြင့် မွေ့လျော်ပုံတို့ကို သိသောအတတ်။
၈။ မဇ္ဇာသ၀ါဒိကရက = သေရည်သေရက် အမျိုးမျိုးတို့ကို ပြုလုပ်ရောစပ်မှု၌ လိမ္မာခြင်း။
၉။ သလဟာရဏ၀ဏာဝိဇ္ဈန = ဒဏ်ရာ (လေးမြှားကျည်ဆန်)တို့ကို ခွဲစိတ်ကုသခြင်း။
၁၀။ အနာဒိပစန = အချက်အပြုတ်အမှန်သမျှ ကျွမ်းကျင်လိမ္မာသော စားဖိုအတတ်။
၁၁။ စိတ္တာဒျလေခ = ပန်းချီပညာ။
၁၂။ ဒုဒ္ဓဒေါဟာဒိဝိညာန = နို့ထောပတ်တို့ကို စီရင်တတ်ခြင်းအတတ်။
၁၃။ ကဉ္စနကာဒိသဗ္ဗန = အင်္ကျီအ၀တ်အစားတို့ကို လှပဆန်းကြယ်အောင် ချုပ်လုပ်ခြင်း။ ၁၄။ ဂေဟဘဏ္ဍဘဇ္ဇန = အိမ်တွင်းတန်ဆာဆင်နည်း၊ ပရိဘောဂ ထားသိုနည်း။
၁၅။ မနောနုကုလသေ၀ါကရဏ = အရှင်သခင်၊ လင်ယောက်ျားတို့၏ စိတ်တိုင်းကျအောင် ပြုစုလုပ်ကျွေး နည်းပရိယာယ်။
၁၆။ သုသုသံရက္ခဏဒါရဏကြိယာ = ကလေးသူငယ်တို့အား စောင့်ရှောက်မွေးမြူချော့မော့ထိန်းသိမ်းရေး။ ၁၇။ နာနာဒေသိယ ၀ဏ္ဏလေခန = ဘာသာမျိုးစုံကို ရေးနိုင်ဖတ်နိုင်ခြင်း။
၁၈။ တမ္ဗုလာရက္ခာဒိကြိယာ = ကွမ်းယာခြင်းအတတ်။
ကဲ...... အဲသည်အတတ်တို့ကို အကဲခတ်ကြည့်ကြစမ်းပါ၊ လွယ်လွယ်ကူကူ ပေါ့ပေါ့ဆဆ လျှပ်ပေါ်လော်လီ နေရုံမျှနဲ့ ဤပညာတွေကိုမရနိုင်ပါဘူး။ အပတ်တကုတ်ကြိုးစားအားထုတ်ပြီး သင်ကြပါရတယ်။ ပြည့်တန်ဆာ ဆိုတာ လမ်းမပေါ်က ကလေကချေမိန်းမလို့ ထင်ရင်မှားပါလိမ့်မယ်။ ရုပ်ရည်ချောမွေ့သလောက် ဉာဏ် ပညာအရည်အသွေးတောက်ပြောင်ရပါမယ်။ အမျိုးအနွယ်အားဖြင့်လည်း ဂုဏ်သရေရှိမင်းမျိုး၊ မှူးမတ်မျိုး ဖြစ်ရပါဦးမယ်။ ကျွန်မ၏ မိခင်ဖြစ်သည့် သာလ၀တီ ကိုပဲကြည့်ပါတော့။ ဝေသာလီ ပြည်မှာ 'ဂဏ' အမတ်ကြီးတစ်ဦးရဲ့သမီး အမ္ဗပါလီ ဆိုတဲ့ပြည့်တန်အမျိုးသမီးကြောင့် တိုင်းပြည်သာယာနေပါတယ်လို့ ကျွန်မတို့ ရာဇဂြိုလ်က ခရီး သွားကုန်သည်ကြီးတွေက လျှောက်ထားသတင်းပေးကြတဲ့အတွက် ဘုရင် ဗိမ္ဗိသာရမင်းကြီးက မှူးမတ်မျိုး ဖြစ်တဲ့ ကျွန်မ၏မိခင်ကို ပြည်ကြီးတန်ဆာအဖြစ် ခန့်ထားသတ်မှတ်လိုက်ခြင်းပါသည်။ ခရီးသွားကုန်သည် ကြီးတွေဟာ အမှန်မှာတော့ မိမိတိုင်းပြည်အတွက်ကုန်ကူးရင်း တိုင်းပြည်ရေးရာ သူလျှိုကြီးတွေလည်း ဖြစ်ပါသည်။ ကျွန်မ၏မိခင်မှာ ဘုရင်ဧကရာဇ်က သတ်မှတ်ခန့်ထားသာဖြစ်လို့ ဥယျာဉ်၊ ပန်းခြံ၊ရထားနှင့်တကွ အခစား အခြွေအရံမိန်းမပျိုကလေးများစွာအပြင် အစောင့်အရှောက်အရံအတားအလုပ်သမားအမှုထမ်းတို့နှင့် ပြည့်စုံ ခမ်းနားစွာနေရပါသည်။ သွားလာဝင်ထွက်ဆက်ဆံခွင့်ရသူများလည်း သေးသိမ်နုပ်မွဲတဲ့ ဆင်းရဲသားများမဟုတ်တဲ့ ဂုဏ်သရေရှိ သူဋ္ဌေးသူကြွယ်များက အနိမ့်ဆုံး အတန်းအစားများဖြစ်ပြီး၊ တိုင်းရေးပြည်မှု ကြည့်ရှုစီမံရတဲ့ မင်းညီမင်းသား၊ မှူးမတ်များ ပြည်တွင်းပြည်ပရန်ကို ခုခံချီတက်အောင်ပွဲရလာသည့် စစ်ရေးစစ်ရာစစ်ဗိုလ်ကြီးများ၊ တိုင်းတပါး မှလာကြသော ဧည့်သည်တော်ကြီးများ၊ ဒီလိုပုဂ္ဂိုလ်များကို ဧည့်ခံ အပန်းပြေစေရခြင်းဖြစ်ပါသည်။ လူအမျိုးမျိုး၊ စရိုက်အဖုံဖုံ ၀ါသနာစုံဖြစ်တဲ့ ပုဂ္ဂိုလ်အသီးသီးကို လိုက်လျောညီထွေ ကျင့်တတ်စေဖို့က ကျွန်မ ပြောခဲ့တဲ့ အတတ်ပညာ (၁၈)ရပ်ကို နှံ့စပ်လိမ္မာရပါသည်။ ကိလေသာကာမ ရသတဏှာ ကိစ္စတစ်ခုသာ မဟုတ်ပဲ မင်းမှုထမ်း၊ စစ်မှုထမ်းများကို နိုင်ငံတော်အတွက် ကြိုးပမ်းသည်ထက်ကြိုးပမ်းနိုင်ကြအောင် အားပေးသွေးထိုးရတာမျိုးများရှိသလို နိုင်ငံရပ်ခြား တိုင်းတစ်ပါးက ဧည့်သည်တော် သံတမန်ကြီးများထံမှ လျှိူ့ဝှက်သတင်းမျိုးစုံကိုလည်း အစ်အောက်မေးမြန်း စုံစမ်းတီးခေါက်ယူရပါသည်။ ဒါကြောင့် ဘာသာအမျိုးမျိုး ၊စာအမျိုးမျိုးကို ပြောနိုင်၊ ဆိုနိုင်၊ ဖတ်နိုင်၊ရေးနိုင်ရမည်ပေါ့။ တကယ်ဆိုတော့ ကျွန်မတို့မှာ နိုင်ငံဝန်ထမ်း ဌာနတစ်ခုလို့ ဆိုနိုင်ပါလိမ့်မယ်။ ကျွန်မ၏မိခင်မှာ တစ်ခါကဘုရင့်သားတော် အဘယ မင်းသားကိုစွဲ၍ ကိုယ်ဝန်ရခဲ့ပါသည်။ မွေးဖွားလာတဲ့ အခါ သားယောက်ျားလေးဖြစ်နေတော့ ကလေးရဲ့နောင်ရေးဂုဏ်သိမ်မမှေးရအောင် ဖခင် အဘယ မင်းသား ကိုယ်တိုင် မွေးစားဖို့ အစီအစဉ်လုပ်ရပါသည်။ အဘယ မင်းသားကလည်း သူ့ရင်သွေးဖြစ်ကြောင့်သိလေ တော့ 'ဇီဝက' ဟုအမည်ပေးပြီး ကောင်းမွန်စွာမွေးစားခဲ့ပါသည်။ ကျွန်မကိုမွေးဖွားတဲ့အခါမှာတော့ သမီးမိန်းကလေးဖြစ်တဲ့အတွက် သူ့အရိုက်အရာကိုဆက်ခံနိုင်အောင် ပညာစွယ်စုံသင်ကြားပေးခဲ့ပါသည်။ မိခင်ကြီးကွယ်လွန်ပြီးတဲ့နောက် ကျွန်မ၏အစ်ကိုကြီးက သမားတော်ကြီး ဇီဝက ဟုထင်ရှားကျော်ကြားနေသလို ကျွန်မမှာလည်း ရာဇဂြိုလ်ပြည်ကြီးမှာ ရုပ်ဆင်းသဏ္ဍာန်ကြန်အင် လက္ခဏာ ဗဟုသုတအဖြာဖြာနှင့် ထင်ရှားကျော်စောတဲ့ မင်းအသိအမှန်ပြု တိုင်းပြည်ဝန်ထမ်း ပြည်ကြီး တန်ဆာဖြစ်လာခဲ့ခြင်းပါ။ ဒါကြောင့် ပြည့်တန်ဆာဟူ၍ အောက်တန်းစား၊ ပညာမဲ့မဟုတ်ကြောင်းပြောချင်ပါသည်။ ကျွန်မမိခင်သာ လျှင်ကွယ်လွန်အနိစ္စရောက်သွားခဲ့သော်လည်း ကျွန်မမိခင်နှင့် ခေတ်ပြိုင်တန်းတူ အမ္ဗပါလီအမျိုးသမီးကြီး သည်ကားဆိုလျှင် ဝေသာလီပြည်က မှူးကြီး၊မတ်ကြီး၊ ပဏ္ဍိတ်ပညာရှိကြီးများထက် အရည်အချင်းသာလွန် လှတဲ့ ဗုဒ္ဓသမီးတော် ထေရီမယ်ကြီးဖြစ်နေရပြီလေ။ ဒါကိုထောက်ဆလို့ ကျွန်မတို့ကို အထင်မကြီးချင်လျှင် နေပါ၊ အထင်တော့မသေးပါနဲ့လို့။ ကြောင်းကျိုးသိမြင် လူ့သခင်တို့က နေ့စဉ်မပြတ်သင်ကြားသည်ရှိသော် တိရစ္ဆာန်မွေး တောမှကြက်တူရွေး ပင်ဖြစ်သော်လည်း လူတို့ဘာသာ ထွေလာထူးပြားလူ့စကားကို သာယာမြည်ကြွေးဆိုတတ်ပါသေးသည်။ မငြိမ်လှုပ်ချောက် တောထဲမှမျောက်တို့ပင်လျှင် လှပယဉ်ကျေး ...က..တတ်ပါသေးသည်။ ထို့အတူ ရှင်တော် ဗုဒ္ဓဟောဖော်ပြတဲ့ ဓမ္မအရသာများကို ခံစားနာကြားရတဲ့ တစ်နေ့ကျလျှင် ကျွန်မအဖို့အရာမှာအဘယ် ကြောင့် နှေး အမြင်မှေး၍ မယဉ်ကျေးပဲ ရှိနိုင်ပါ့မလဲရှင်။ တစ်နေ့သောနံနက်ခင်းအခါ ကျွန်မရဲ့ သီးသန့်သဉ္ဇာလီဆောင်အတွင်း ခင်းထားအပ်သော ခုတင်ပေါ်မှာ အသာအယာလှဲလျောင်း၍ နေပါသည်။ ကျွန်မရဲ့ အခြွေအရံမိန်းမပျိုတစ်ယောက်က ဒေါင်းမြီးယပ်နဲ့ခပ်ပေး နေ၍ တစ်ဦးကတော့ ကျွန်မ၏ လက်သည်းများကို စပယ်ဖူးကလေးများနဲ့တူအောင် ကိုက်ညှပ်ပေးနေစဉ် ၀ယ်..တစ်ဦးကတော့ ခြေရင်းကထိုင်၍ ခြေသည်းကလေးများကို ဒန်းဆိုးပေးနေပါသည်။ ကျွန်မရဲ့ခါးပေါ်မှာ ပါးလွှာတဲ့ ပိုးသားကလေးသာ လျော့ရိလျော့ရဲ တင်ထားပါသည်။ အဲသည့်ပိုးသားအောက် ကကျွန်မရဲ့ ဖြောင့်စင်းတဲ့ ပေါင်တံကို အမျိုးသမီးတစ်ဦးက မွှေးကြိုင်သော နံ့သာဆီနှင့် လိမ်းကျံနှိပ်နယ် ပေးနေပါသည်။မနီးမဝေးမှာ စောင်းအတီးသင်နေကြတဲ့ ကလေးမများကဖြင့် စောင်းချင်းများကို ထံတျာဖြည့် စွက်၍ လက်သံပြနေကြဆဲအခါဖြစ်ပါ၏။ ထိုအတောအတွင်းမှာ အိပ်ခန်းအပြင်ဝယ် တာဝန်ကျနေသော မိန်းမပျိုလေးက အိပ်ခန်းထဲ ကမန်းကတန်း ၀င်လာခဲ့ပြီး ကျွန်မရဲ့အိပ်ယာဘေးမှာ ပုဆစ်ဒူးတုပ်ထိုင်လိုက်ရင်း.... " မမ၊ ကျွန်မတို့ဥယျာဉ်တွင်းကို ရထားပေါင်းချုပ်တစ်စင်းဝင်လာပါတယ်" "ဟဲ့....ဒီအချိန်မှာ ဘယ်ကဧည့်သည်များလာနေတာလဲ၊ ငါ့ဆီကို ကြိုတင်အချိန်းအဆိုမရှိပဲနဲ့ ဘယ်သူတစ်ဦး တစ်ယောက်မှမလာရဘူးဆိုတာ ပြောလိုက်" သူငယ်မလေးက သွက်လက်ဖျတ်လတ်စွာ ထ,ထွက်သွားပါသည်။ သို့သော် မကြာမတင်ပြန်ဝင်လာပါသည်။ " မမ၊ ဧည့်သည်က အလွန်ကျက်သရေရှိတဲ့ အမျိုးသမီးတစ်ဦးပါ၊ သူ..အခုအဆောင်ဝ လှေကားမှာ ရထားက ဆင်းနေပါပြီ " " ဟေ.....အမျိုးသမီးတစ်ဦး " ကျွန်မကထူးဆန်းနေသောကြောင့် လဲလျောင်းနေရာမှ အသာအယာထလိုက်ရာ အနှိပ်သည်မလေးကဖေးမ ပြီး ထူပေးလိုက်ပါသည်။ " ဘာကိစ္စတဲ့လဲ၊ ဘယ်သူဆိုတာ သွားမေချေအုံး၊ ငါ အချိန်တွေအလကား မဖြုန်းနိုင်ဘူး " " ဟုတ်ကဲ့...မမ " ကျွန်မက အပေါ်ရုံအင်္ကျီခပ်ပွပွကို လှမ်းလင့်၍တောင်းလိုက်သည်၊ အရိပ်အကဲကိုသိတတ်ကြသော အခြွေအရံတို့က စံပယ်နဲ့သင်းထားသော ကောဋုမ္ဗရာဇ် ပိုးအပေါ်ရုံအင်္ကျီကို တစ်ယောက် တစ်ဖက်ကိုင်ကာ အဆင်သင့်ဝတ်ပေးကြသည်၊ သရဖီနံ့ထုံသောခေါင်းလျှော်ရည်ဖြင့် လျှော်ထားခါစ ကျွန်မ၏ဆံကေသာတို့ မှာပခုံးတစ်ဖက်တစ်ချက်က လျော့ကျကော့ကျ၍ ဒူးဖျားဝယ် ဖုံးအုပ်နေကြသည်၊ ကျွန်မရှေ့ဝယ်လာ၍ ထောင်ပြသော ကြေးမုံပြင်ဝယ် ကျွန်မ၏မျက်နှာသွင်ပြင်ကို တစ်ချက်ကြည့်လိုက်ပါသေးသည်။ " မမ၊ ဧည့်သည်အမျိုးသမီးက မမနဲ့သာတွေ့ပါရစေလို့တောင်းဆိုနေပါတယ်၊ ကိုယ်ရေးကိုယ်တာကိစ္စတစ်ခု ပါလာတယ်လို့လည်းပြောပါတယ်၊ ဘာပဲဖြစ်ဖြစ် အထက်တန်းကျကျသဘောသကာယကောင်းတာကိုတော့ ကျွန်မပြောဝံ့ပါတယ်၊ သူ့အမူအရာဟာ ခင်မင်နှစ်လိုဖွယ်ရှိပါတယ် " " အမယ်လေး၊ ငါ့ထက်များလှနေပလားကွယ်၊ ကဲ..ကဲ..မုဒရက်ဖျော်ရည်ကလေးများနဲ့ ဧည့်ခန်းမှာဧည့်ဝတ် ပြုထားလိုက်ကြ " မကြာမတင် အခန်းကြီးထဲကိုကျွန်မ၀င်သွားပါသည်။ စိန့်ပြည်မှလုပ်သော စန္ဒကူးညောင်စောင်းပေါ်တွင် ကျွန်မနှင့်အသက်အရွယ်မတိမ်းမယိမ်းရှိသောမိန်းမပျိုကိုမြင်လိုက်ပါသည်။ သူကမူကျွန်မကိုမမြင်သေး၊ အဖိုးထိုက်တန်သော ပရိဘောဂနှင့်မွမ်းမံခြယ်လှယ်ထားသော အဆင်အပြင်များကို စိတ်ဝင်စားနေပုံရ သည်။ ထို့ကြောင့်သာပင် ကျွန်မက ကျွန်မလောက်မလှသော်လည်း ကျက်သရေရှိသော သူ့မျက်နှာ၏ ထူးခြားချက်ကို ကောင်းစွာသတိပြုနိုင်လောက်အောင်အချိန်ရလိုက်ပါသည်။ ကျွန်မက လေးတွဲ့ယဉ်နွဲ့သော ခြေလှမ်းဖြင့် သူ့အပါးကိုလျှောက်သွားပြီးကာ... " ကျွန်မ သီရိမာပါ " ဟု နှုတ်ခွန်းဆက်လိုက်ပါသည်။ သူကကျွန်မကိုကြည့်၍ တစ်ခဏကလေးလောက်အံ့သြသွားပုံရပါသည်။ နောက်မှခင်မင်သောအပြုံးကို ဆောင်၍ မတ်တတ်ထလိုက်ပါသည်။ " ဒီလောက်လှတာဟာ သီရိမာပဲဖြစ်ရမှာပေါ့၊ ကျွန်မကတော့ ဥတ္တရာပါ " သူကသူ့ကိုယ့်သူ မိတ်ဆက်ရင်း လက်နှစ်ဘက်ကို ကမ်းလင့်ပါသည်။ သူကမ်းလင့်သော လက်နှစ်ဘက်ကို ကျွန်မက ကျေကျေနပ်နပ်ကြီးကိုင်၍ နှစ်ယောက်သား ယှဉ်ထိုင်မိကြပါသည်။ သူသည်အဆင့်အတန်းအနိမ့်အမြင့်ကို ပဓာနပြုပုံမရ၊ မိန်းမတို့မည်သည် ၀န်တိုခြင်း၊ မစ္ဆရိယပွားခြင်း၊ တစ် ဖက်လူအား နှိမ့်ချခြင်းမြင့်သာ မာန်မာနတက်ကြွကြပါသည်။ " ဥတ္တရာ လို့ကျွန်မကြားဖူးနေတာတော့ ကြာပါပကော " " ဟုတ်ကဲ့....သုမနသူဋ္ဌေးကြီးရဲ့ ချွေးမပါ " " သြော်...သြော်....နန္ဒသူဋ္ဌေးကလေးရဲ့ သက်ထားကြင်ယာပေါ့နော် " " ဟုတ်ပါတယ်..သီရိမာ၊ ကျွန်မယောက်ျားကိုများတွေ့ဖူးပါသလား " " အို..အို..သူ့ခမျာကို အထင်မမှားလိုက်ပါနဲ့၊ ကျွန်မအပါးကို သူမရောက်ဖူးပါဘူး" ဟုကျွန်မက ရယ်သွမ်းသွေး လိုက်သောအခါ ကျွန်မစကားကို သံသယကင်းစွာလက်ခံပါသည်။ " အင်း..သူသီရိမာနဲ့မတွေ့ဖူးတာ..ကျွန်မအတွက် နစ်နာတာပဲ" " ဘာကိုဆိုလိုတာလဲ ဥတ္တရာရဲ့" ဤအတွင်းကျွန်မရဲ့အခြွေအရံက မနောလင်ပန်းဝယ် ရွှေခွက်နှစ်ခွက်နှင့်ထည့်လာအပ်သော မုဒရက်ဖျော် ရည်များကို တရိုတသေပေးလာ၏။ ကျွန်မက ဥတ္တရာအား ရိုရိုသေသေ တစ်ခွက်လှမ်းပေးလိုက်ပြီး ကျွန်မက တစ်ခွက်ကိုင်ထားလိုက်သည်။ အခြွေအရံကလေးသည် မနောလင်ပန်းကို ရင်ဝယ်ပိုက်လျက် မတ်တပ်စုံရပ် ကာ အစေအပါးကို ခံယူလျက်ရှိသည်။ ဥတ္တရာသည် ထိုမိန်းကလေးအားပြုံးကြည့်လိုက်သည်။ ကျွန်မ သူ့ဆန္ဒကိုချက်ချင်းသိလိုက်ပါသည်။ " မင်းသွားနိုင်ပြီကွယ်၊ ငါလိုတော့မှခေါ်လိုက်တော့မယ်နော်" မိန်းမပျိုလေးက ရို့ရို့ကျို့ကျို့နောက်တဆုတ်ဆုတ်ဖြင့်အခန်းအတွင်းမှကွယ်ပျောက်သွားသည်။ " သီရိမာနဲ့သာ တွေ့ဖူးရင် ကျွန်မ လွတ်လွတ်လပ်လပ်ကြီး ဥပုသ်ပြုနိုင်မှာပေါ့၊ အခု ကျွန်မကို ကူညီပါလို့ တောင်းပန်ရအောင် လာခဲ့တာပဲ သီရိမာ" သူကကျွန်မအား အဖျော်ရည်ကို ဦးစားပြု၍သောက်ရန်ရွှေခွက်ကို မြှောက်ပြလိုက်သည်။ ကျွန်မကအိမ်ရှင် ပီပီသူ့ကိုပြန်၍ ဦးစားပေးလိုက်ရသည်၊ ထိုအချိန်မှ သူကနှုတ်ခမ်းပါးကလေးမျှသာ စွတ်အောင် ရွှေခွက်ကို ပင့်လိုက်သည်။ ယဉ်ကျေးမှုကို အတော်ရိုသေပါကလားဟု ကျွန်မမှတ်ချက်ချလိုက်မိပါတော့သည်။ " အစ်မကြီးစကားကြားရတာ ကျွန်မထူးဆန်းနေတယ်၊ ဂုဏ်သရေရှိတဲ့ဇနီးမယားမှန်သမျှ သူတို့လင်သားကို ကျွန်မဆီမသွားမလာကြအောင်ပဲ ထိန်းကွပ်ချုပ်ချယ်ထားလေ့ရှိပါတယ်၊ အစ်မကြီးကတော့အစ်မကြီးခင်ပွန်း နဲ့ကျွန်မကို တွေ့ပေးစေချင်တဲ့သဘောလား၊ သြော်...ခွင့်ပြုပါနော်၊ ကျွန်မရှင့်ကိုအစ်မကြီး ခေါ်ချင်လာတယ်" "ခေါ်ပါညီမငယ်၊ အစ်မကြီးဝမ်းသာပါတယ်၊ ညီမငယ်က အစ်မကြီးထက်တောင်လှပပျိုမြစ်နေတာပဲ၊ အစ်မကြီးဂုဏ်ယူပါတယ်၊ ဒါထက်ရိုင်းတယ်လို့မထင်ရင်မေးပါရစေ၊ ငါ့ညီမရဲ့အဖိုးစားနားက ဘယ်လောက် သတ်မှတ်ပါသလဲ " " သြော်..ဟော်..ဟော်.." ကျွန်မက ဂုဏ်ယူစွာမပွင့်တပွင့်လေးရယ်ပြလိုက်သည်။ " ဒီရာဇဂြိုလ်ပြည်မှာ ကျွန်မရဲ့အဖိုးစားနားကို မကြားဖူးတဲ့လူမရှိပါဘူး၊ တစ်နေ့ကို အသပြာတစ်ထောင်ဆို တာနန်းတွင်း၊နန်းပြင်သိနေကြပါတယ်၊ အင်းလေ....အစ်မကြီးကတော့ အမျိုးသမီးပေကိုး၊ ကာမစ္ဆန္ဒနီဝရဏ တွေကိုဂရုမစိုက်ကြောင်းလည်းညီမလေးရိပ်မိပါပြီ၊ ဧကန္တ အစ်မကြီးဟာ ဗုဒ္ဓရဲ့အဘိဓမ္မာကို သက်ဝင်ယုံ ကြည်နေတယ်မှတ်တယ် " " ဘယ့်နှယ်ပြောပါလိမ့်ညီမရယ်၊ ညီမကော....မယုံကြည်ဘူးလား " " အင်း..တစ်နေ့နေ့မှာ ယုံကြည်လာမလားတော့မသိဘူး " " ဟုတ်တာပေါ့..ညီမရဲ့၊ ပတ်ဝန်းကျင်နဲ့ ဗုဒ္ဓရဲ့အဘိဓမ္မာဟာဆက်စပ်မှုရတဲ့ တစ်နေ့ဖြစ်မှာပေါ့၊ ဝေသာလီက အမ္ဗပါလီအမျိုးသမီးဟာ ညီမတို့လိုပဲလေ၊ သူကတော့ ဘုရားသာသနာတော်ကိုတောင်ဝင်ပြီး ခိဏာသ၀ ရဟန္တာမကြီးဖြစ်သွားတယ်လို့ကြားပါကလား " " အင်း...သူ့အသက်ကကြီးလာလို့ထင်ပါရဲ့၊ ကျွန်မရဲ့မိခင်နဲ့မှ သူကတစ်ရွယ်ထဲကိုး၊ ဒါထားပါတော့၊ ကျွန်မ အစ်မကြီးအတွက် ဘယ်လိုဆောင်ရွက်ပေးရမလဲ၊ ပြောသာပြောပါ " ဥတ္တရာက ဘာမှမပြောခင် ကျွန်မကိုပြုံးကြည့်နေပါသေးသည်။ " ပြောရမှာတော့အားနာတယ်.သီရိမာ၊ ကျွန်မခင်ပွန်း နန္ဒသူဋ္ဌေးသားကလေးဟာ သူ့ဖခင် သုမနသူဋ္ဌေးကြီး လိုပဲ၊ ဗုဒ္ဓရဲ့အဆုံးအမကိုလက်မခံသေးဘူး၊ ကျွန်မကတော့ ကျွန်မရဲ့မိဘကဆင်းသက်ပြီး ရတနာသုံးပါးနဲ့ ဒါန၊သီလ၊ဘာဝနာကိုအားကိုးပြုပြီးနေတယ်၊ ဒါပေမယ့် သူနဲ့အကြောင်းပါတဲ့နေ့ကစပြီး အဋ္ဌင်္ဂဥပုသ်ကို စောင့်ထိန်းခွင့်မပေးပဲ သူ့ကိုသာ နေ့ရှိသမျှ လုပ်ကျွေးနေရတယ်လေ " ကျွန်မကသူ့စကားဆုံးတော့ ခစ်ခနဲ ရယ်လိုက်မိပါသည်။ " ကျွန်မအဖြစ်က ရယ်စရာကောင်းတယ်နော်..သီရိမာ " " မဟုတ်ဘူးအစ်မကြီး၊ ကျွန်မပြက်ရယ်ပြုတာမဟုတ်ပါဘူး၊ အစ်မကြီးရဲ့ခင်ပွန်းဟာ အစ်မကြီးကို ဘယ်လောက်ချစ်တယ်ဆိုတာ ရိပ်မိနိုင်လို့ရယ်မိတာပါ " " ဒါ...ချစ်တယ်လို့ခေါ်သလား..သီရိမာ၊ အိုတဲ့..နာတဲ့..သေတဲ့..အထိသူချစ်နိုင်မှာမဟုတ်ပါဘူး၊ အဆင်းလှ တုန်း၊ အရွယ်နုပျိုတုန်းကျန်းမာသန်စွမ်းတုန်းသာချစ်စရာလို့သဘောထားနိုင်တာပါ၊ တကယ်ဆိုတော့ သူ့ ကိုယ်တောင် သူမသိသေးပါဘူး " အင်း..ဒါစဉ်းစားစရာပဲ၊ ကျွန်မအမေအရွယ်လွန်သွားတဲ့အချိန်မှာ ဘယ်သူမှအရေးမစိုက်ကြတော့ဘူး၊ ပျိုနု စဉ်မှာလူတိုင်းအနမ်းခံရတဲ့ ပန်းကလေးလိုဘ၀က အိုလာတော့ အမှိုက်သရိုက်လိုသဘောထားလာကြတယ်၊ ကျွန်မရဲ့ဒီအလှအပနဲ့နုနယ်ပျိုမြစ်ခြင်းဟာလည်း ဘယ်လောက်များကြာကြာခံပါ့မလဲ၊ နောက်ငါးနှစ်၊နောက် ဆယ်နှစ့်........................ ကျွန်မက အထိတ်တလန့်နှင့်ရှေ့ရေးကို တွေးနေမိသောကြောင့်စကားစပြတ်နေကြသည်။ " ဘာတွေများတွေးနေသလဲ..သီရိမာ၊ လှလွန်းတဲ့မိန်းကလေးကို ဇရာအကြောင်းပြောမိတာ စိတ်အနှောင့် အယှက်ပေးရာများ ကျသွားပလား " " အင်း..ကျွန်မစဉ်းစားမိတယ်ဆိုပါတော့၊ ဒါပေမယ့် အခုလှနေတာကလေးကိုတော့ ကျွန်မကျေနပ်နေသေး တယ်လေ" ပြည့်ဖြိုးသော ကျွန်မ၏လက်မောင်းကလေးကို သုံးသပ်ရင်းပြောလိုက်မိသည်။ ဟုတ်ပါသည်။ ကျွန်မလက်မောင်းကလေးဟာ အသားအရေက ရွှေလိုဝင်းပနေပါသည်။ အရိုးအဆစ်မပေါ်ပဲ သွယ်သွယ်ပျောင်းပျောင်းရွှေငှက်ပျောပင်ကထွက်လာတဲ့ အစို့ကလေးလိုနူးညံ့သန့်စင်နေပါသည်၊ ရွှေရောင် ပြေးနေတဲ့ အမွေးနုကလေးများက ခပ်ရေးရေးကလေးရှိပါသည်။ ဥတ္တရာသည် ကျွန်မရုပ်ပသာဒကို ကျွန်မတပ်မက်နေကြောင်းသိ၍ ကရုဏာသက်သောအပြုံးဖြင့်ခေါင်း တဆတ်ဆတ်ညိတ်နေပါသည်။ ကျွန်မသူ့အရိပ်အကဲကိုသိ၍ ချစ်စနိုးစွာ စကားဆက်လိုက်ရသည်။ " ကဲလေ...ကျွန်မဘယ်လိုကူညီရမလဲ " " ဆယ့်ငါးရက်တိတိ ကျွန်မအိမ်မှာလာနေပြီး ကျွန်မကိုယ်စားကျွန်မရဲ့ခင်ပွန်းကို ပြုစုလုပ်ကျွေးပေးပါ သီရိမာ၊ ကျွန်မ ဗုဒ္ဓကိုအိမ်မှာဆွမ်းပင့်ကျွေးချင်တယ်၊ အဋ္ဌင်္ဂသီလ ဆောက်တည်ချင်တယ်၊ တရားနာချင် တယ်၊ သီရိမာအတွက် ကျသင့်တဲ့ငွေ တစ်သောင်းငါးထောင်ကို အခုပေးသွင်းခဲ့ပါမယ် " " နေပါဦးလေအစ်မကြီး၊ ဆယ့်ငါးရက်တောင်များလှချည့်၊ နောက်ပြီးတော့ အစ်မကြီးရဲ့ခင်ပွန်းကကျွန်မကို နှစ်သက်လိမ့်မယ်လို့အစ်မကြီးပြောရဲလို့လား" ဟု မချိုမချဉ်နှင့်တမင်သွေးတိုးစမ်းကြည့်လိုက်သည်။ " အမယ်လေးလေ၊ ငါ့ညီမလောက်လှတာ ရာဇဂြိုလ်မှာ အရှားသားကလားကွယ်၊ ဒါကိုလက်မခံဘူးဆိုရင် ကာယဂတာသတိအမြဲရှိနေတဲ့ ယောဂီသာဖြစ်တော့မပေါ့၊ အစ်မကြီးခင်ပွန်းအကြောင်းအစ်မကြီးသိပါတယ်" ဥတ္တရာကပြုံးရုံသာပြုံးလိုက်စေကာမူ ကျွန်မကညိုးညိုးညံညံကလေးဖြစ်အောင်ရယ်၍ သူ့ရှေ့ဝယ်မတ်တပ် ထလိုက်ပါသည်။ ကျေနပ်စွာလှုပ်ရှား၍ခါးကလေးပေါ်သို့လက်နှစ်ဘက်တင်ကာတစ်လှမ်းနှစ်လှမ်း လျှောက် လိုက်ပါသည်။ မေးမည့်သာမေးလိုက်သည်၊ ကျွန်မရဲ့ရူပါရုံကွန်ချက်က ပြေးထွက်နိုင်သောသူအလွန်ရှား သဖြင့်သူ့ယောကျာ်းလည်း ဘာသားနှင့်ထုသနည်းဟု သိပြီးဖြစ်ပါသည်။ ဥတ္တရာက လက်ခုပ်သုံးချက်တီးလိုက်သည်၊ ဧည့်ခန်းကြီးအပြင်ဝယ်စောင့်နေရစ်ခဲ့ရသောသူ့အခြွေအရံက ငွေထုပ်ပိုက်ပြီး ၀င်လာပါသည်။ " ဟောဒီမှာငွေတစ်သောင်းငါးထောင်ပါ သီရိမာ၊ အစ်မကြီးရဲ့ကုသိုလ်ကမ္မပထကို ကူညီတဲ့အတွက်ညီမမှာ လည်းကောင်းမှုရဲ့အထောက်အပံ့ဖြစ်ပါလိမ့်မယ် " " အင်း....ကျွန်မကတော့ ဇနီးသည်တစ်ယောက်က သူ့ခင်ပွန်းအတွက် ကိုယ်တိုင်လာခေါ်ရတယ်ဆိုတာပဲ ဂုဏ်ယူချင်ပါတယ်၊ ဒါပေမယ့် ကျွန်မဘ၀ဟာ ပုဂ္ဂလိကပစ္စည်းမဟုတ်တာတော့အစ်မကြီးသိကောင်းပါရဲ့၊ ဆယ့်ငါးရက်တော့ ကျွန်မအချိန်ပေးနိုင်ပါ့မလားမသိဘူး " " ကောင်းပါပြီ၊ ကောင်းပါပြီ၊ ငါ့ညီမဆန္ဒရှိရာပြည့်စုံပါစေတော့၊ မနက်ဖြန်မနက်ရထားလွှတ်လိုက်ပါ့မယ် " " အို....ကိစ္စမရှိပါဘူး၊ ကျွန်မရထားနဲ့ပဲလာခဲ့ပါ့မယ် " ဥတ္တရာက ကျွန်မလက်နှစ်ဘက်ကိုလှမ်းကိုင်လိုက်ပြန်ပါသည်။ ကျွန်မကသူ့ကိုတွဲဖက်ရင်း ရထားပေါင်းချုပ် ပေါ်အရောက်လိုက်ပို့ပါသည်၊ သူ့ရထားဥယျာဉ်မှထွက်သည်အထိပြုံးကြည့်နေမိသည်။
************************************************************************** ကျွန်မ၏မြင်းဖြူလေးကောင်'က'သောရထားက နန္ဒသူဋ္ဌေး၏တိုက်ဝသို့ဆိုက်လိုက်ပါသည်။ ရထားနောက်မြီး တွင်ရပ်ပါလာကြသော အမှုထမ်းနှစ်ယောက်က လျင်မြန်သွက်လက်စွာဆင်း၍တံခါးဖွင့်ပေးလိုက်သည့် အချိန်ဝယ် ဥတ္တရာသည်ရထားပေါ်က ကျွန်မအားသူ့လက်နှစ်ဖက်ကမ်း၍ လှမ်းကြိုလိုက်ပါသည်။ " ကျေးဇူးတင်လှပါတယ် အစ်မကြီး " ကျွန်မက သူ့ယုယမှုကို အသိအမှတ်ပြုကာ ရထားပေါ်မှဆင်းလိုက်ပါသည်၊ အဆင်သင့်ရှိနေသော သူ့ခြွေရံ သင်းပင်းများက ကျွန်မ၏တံတင်းသေတ္တာများကို ကျင်လည်စွာသယ်ယူသွားကြပါသည်၊ အလှအပအသုံး အဆောင်အ၀တ်တန်ဆာများပင်ဖြစ်ပါသည်။ ကြီးမားကျယ်ဝန်းသောခန်းမကြီးသို့ရောက်လျှင် အိမ်မှုလုပ်သား ယောက်ျား၊မိန်းမအကုန်ကျွန်မကိုကြည့်၍ အထူးအဆန်းသဖွယ်အံ့သြနေကြပါသည်၊ တိုးတိုးတိတ်တိတ်ချောင်းမြောင်းကြည့်သူများလည်းအများအပြား၊ ဒီကြားထဲ " နာမည်ကြီးသလောက်လည်း လှသကိုး" ဟုယောက်ျားတစ်ယောက်၏အသံကကျွန်မကိုဝေဖန် နေသဖြင့် နန္ဒသူဋ္ဌေးဖြစ်လေမလားဟု ခေါင်းငဲ့၍ကြည့်လိုက်မိသည်၊ အတော်သားနားသော ဝေဖန်သည့် ယောက်ျားကား သူ့စကားသူရှက်စနိုး၍ အခန်းအတွင်းမှခပ်လျှိုးလျှိုးထွက်သွားသည်ကို မိန်းကလေးများက ကျိတ်ပြီးရယ်လိုက်ကြပါသည်။ " သူဋ္ဌေးမင်းအပေါ်ဆောင်မှာရှိပါလိမ့်မယ်၊ သွားကြရအောင်နော် " ကျွန်မကစကားမပြန်ပဲ ခေါင်းကိုဆတ်ခနဲ ညိတ်ပြလိုက်ပါသည်။ ပွတ်လုံးများဖြင့်ကြီးမားကျယ်ဝန်းသောလှေကားကိုနှစ်ယောက်သားတက်လာခဲ့ကြသည်။ လှေကားထိပ် အပေါ်ဆောင်တွင်အဆင်သင့်ရှိနေကြသော မိန်းမပျိုနှစ်ယောက်က ကျွန်မတို့အား အရိုအသေပေးလိုက် သည်။ " ညည်းတို့အရှင် အခန်းတွင်းမှာပဲလား " " ဟုတ်ပါတယ် သခင်မ၊ ဧည့်သည်အတွက်လည်း ဤအခန်းနဲ့ကပ်လျက်အဆောင်မှာ ပြုပြင်ထားပါပြီ " " အေး..အေး..မင်းတို့လွတ်လပ်စွာနေကြတော့ " ခန်းဆောင်ကြီးတစ်ခုကို ဖြတ်သန်းသွားပြီးနောက် ကတ္တီပါသပြေနုရောင်စည်းထားသည့် အတွင်းခန်းသို့ ဥတ္တရာကရှေ့ဆောင်ပြုပြီးဝင်သည်။ကျွန်မကသူ့နောက်ပါးမကျတကျကလိုက်သွားသည်။ ကျွန်မထက်ငါးနှစ်လောက်သာကြီးမည်ဟုခန့်မှန်းရသော သူဋ္ဌေးလေးကိုသလွန်ညောင်စောင်းတစ်ခုပေါ် တွင်တွေ့လိုက်ရပါသည်။ သူသည်သေအရက်ကိုရွှေခွက်နှင့်သောက်နေဆဲဖြစ်သည်၊ ကြန်အင်လက္ခဏာမှာ ခံ့ညားမွန်ရည်၍အပူအပင်အကြောင့်အကြစိတ်သောကကို သူ့အဇ္ဈတ္တအတွင်းသို့အရောက်မခံသည့်လူစား မျိုးဖြစ်ဟန်ရှိသည်။ ဥပဓိရုပ်ကောင်းသလောက် ကာမသုခလ္လိကာနုယောဂ ကျင့်သုံးပုံကိုအကဲခတ်နိုင်သည်။ မည်သို့ပင်ဖြစ်စေ သဘောထားဖြေင့်စင်းလျက် နှစ်လိုဖွယ်သောအဆင်းရှိသူတစ်ဦးဖြစ်ကြောင်းကိုကား ကျွန်မသိလိုက်ပါပြီ။ " ဟောဒီမှာ..သီရိမာ ရောက်လာပါပြီ အရှင့်သား " သူက ကျွန်မကိုစောင်းငဲ့၍ကြည့်လိုက်သည်။ ကျွန်မကလည်းသူ့ကိုသာ တည်တည်ကြည်ကြည်စူးစူးစိုက် စိုက်ကြည့်နေလိုက်သည်၊ သူ့စက္ခုဝိညာဉ်နှင့်ကျွန်မရူပါရုံသည် သံလိုက်နှင့်အပ်သဖွယ်ဖြစ်နေပါပြီ။ " ကဲ - သီရိမာ၊ ကိုယ့်အိမ်ကိုယ့်ယာလို သဘောထားပြီးပျော်ပျော်ပါးပါးနေပါနော်၊ အိမ်စေအမှုလုပ်များက လည်း 'ကျွန်' မနဲ့မခြား ခ,စားရိုသေကြပါလိမ့်မယ် " ဥတ္တရာ၏စကားကိုကျွန်မက လက်ခံလိုက်သည့်သဘောနှင့် ခေါင်းညိတ်လိုက်သည့်အချိန်တွင် နန္ဒကတော့ ကျွန်မ၏တစ်ကိုယ်လုံးကို ခြေဆုံးခေါင်းဆုံးကြည့်နေဆဲပင်ဖြစ်သည်။ သူအကြည့်ရဲသလောက်ကျွန်မက လည်းပသာဒကိုစွန့်ကြဲနေပါသည်။ သူဋ္ဌေးကတော်သည်သူ့ခင်ပွန်း၏အကဲခတ်ပုံကိုခပ်ပြုံးပြုံးနှင့် လျစ်လျူ ပြုလိုက်သည်။ မဆွကပင်အစစအရာရာ လင်နှင့်မယား သဘောတူစီစဉ်ထားသည့်အလား နောက်ထပ် ထူးထူးထွေထွေမပြောတော့ပဲ ဥတ္တရာက ကျွန်မကိုယဉ်ကျေးစွာနှုတ်ဆက်၍ ထွက်သွားပြီးသည့်နောက် ကတ္တီပါခန်းဆီးကာထားသည့်အပြင်ဘက်တံခါးမကြီးပိတ်လိုက်သံကြားရပါသည်။ မတုန်မလှုပ်ဖြစ်နေသေးသူနှင့်ကျွန်မနှစ်ဦးတည်းသာလွတ်လပ်စွာကျန်ရစ်ခဲ့မှန်းသိသဖြင့် သူရှိရာသို့ ရဲရဲ ၀ံ့ဝံ့တစ်လှမ်းနှစ်လှမ်းတိုးသွားပြီး သူ့ရှေ့တည့်တည့်မတ်မတ်မှာရပ်လိုက်သည်။ " သီရိမာကိုမနှစ်လိုရင် အနှောင့်အယှက်မပေးချင်ပါဘူး မောင်မောင် " ကျွန်မစကားက ငိုက်မြည်းနေသူကို ထိပ်ပုတ်၍ အနှိုးခံရသကဲ့သို့ရှိပါသည်။ " အို - အို..ဒီလိုမဟုတ်ပါဘူး" " ဧည့်သည်တစ်ယောက်ကိုပျူပျူငှာငှာမရှိပုံက ဧည့်ခံတာမဟုတ်ပဲ ပြန်နှင်နေတာနဲ့မတူဘူးလား၊ ဒါမှ မဟုတ်လည်း အာသဝေါကုန်ခမ်းတဲ့ ရဟန္တာကြီးများ ကျွန်မဖူးတွေ့နေရပြီလားလို့ " " ဗြုန်းခနဲ ဆိုတော့ အံ့သြသွားမိလို့ပါ..သီရိမာ " " အံ့သြတယ်...ဘာဖြစ်လို့...အံ့သြရတာလဲ " " သြော်..အိပ်မက်များ..မက်နေတာလားလို့ " " ထမင်းလုံးတစ္ဆေအခြောက်ခံနေရတယ်လို့များ မက်နေတာလားဟင် " " ကိုယ့်အလှကိုယ်သိရက်သားနဲ့တော့..တစ်ဖက်လူကိုငေါ့ဖို့မကောင်းပါဘူးကွယ် " ကျွန်မကတမင်အသံသာသာကလေးဖြစ်အောင် ရယ်လိုက်ပါသည်၊ သူကတော့မရယ်နိုင်၊မပြုံးနိုင် မျက် တောင်မခတ် ရွှန်းရွှန်းစားစားကြည့်နေဆဲပင်ရှိပါသေးသည်။ ဒါကိုပင်ကျွန်မက ကျေနပ်နေရသည်။ " လှံသွားဖြင့်အသားကိုထိုးသော် တရားစွဲနိုင်၏၊ မျက်စိဖြင့်အသဲအတွင်းသို့ ထိုးနစ်သော် တရားမစွဲနိုင်၊ သို့ သော်ဒဏ်ရာက တူမျှချေ၏ လို့နီတိဆရာက ဆိုပါတယ်မောင်မောင် " ထိုအခါမှ သူကပထမဆုံးပြုံးခြင်းဖြင့် ပြုံးပြလိုက်ကာပြန်၍ချေပလိုက်သည်။ " မေတ္တာသည် အသဲသို့စူးဝင်သောမြှားဆိပ်ကိုပင်ပြေစေပါသည် သီရိမာ၊ ဤနေရာတွင်ထိုင်စမ်းပါအုံး" ဟုသူ့အနားက ကတ္တီပါနေရာခင်းကို လက်နှင့်သပ်၍ဖိတ်ခေါ်လိုက်သည်။ သို့သော်ကျွန်မက ဗြုန်းခနဲမထိုင် သေးပါ၊ သူကိုယ်တိုင်ကိုယ်ထိလက်ရောက်ခေါ်ငင်ခြင်းကိုဂုဏ်ယူလိုက်ချင်ပါသေးသည်။ ထို့ထက်ပြောရ လျှင်ကျွန်မ၏ အလှအပအောက်ဝယ် ဒူးထောက်၍အညံ့ခံစေချင်သေးသည်။ ငွေကြေးနှင့်ဝယ်ယူရသည်ဟု သူစွဲမှတ်ထားတာမျိုးကိုကား သူ့ပိုင်နက်မို့ ကျွန်မကလုံးဝလက်မခံလိုပါ။ " အချို့သောသက်ညှာသည့်ယောကျာ်းများဟာ မိန်းမသားရဲ့အင်္ကျီဝတ်ရုံကို ကူညီပြီးသိမ်းဆည်းပေးတတ် တယ်ဆိုပါကလား....မောင်မောင်ရယ်.." ကျွန်မ၏အပေါ်ယံဖဲဝတ်ရုံကို ချွတ်လိုက်တော့မည်ဟန်ပြုဆဲတွင် သူကထိုင်နေရာမှထ၍ လောက၀တ်ပြုပါ သည်။ကျွန်မက သူအင်္ကျီချွတ်ယူနိုင်အောင် သူ့ကိုကျောပေး၍ အဆင်သင့်အနေအထားတွင်ရပ်လိုက်ပါ သည်။ ပုခုံးနှစ်ဖက်ကိုကိုင်ကာ ကျွန်မ၏၀တ်ရုံကို ချွတ်ခွာလိုက်သောအခါကား သူ့နှာတံမှ ပူနွေးသော အဿာယ ထွက်လေသည်..ဆံနု၊ဆံယဉ်ကလေးများဝဲနေသည့် ကျွန်မ၏လည်ကုပ်ကို တိုးဝှေ့သွားသည်။ ၀င်သက်အနေနှင့်ကား ကျွန်မကုပ်ပေါ်က ကတိုးနံ့ကို သူသယ်ယူသွားပြီးဖြစ်ပါသည်။ အပေါ်ယံဝတ်ရုံမှ ကင်းကွာသွားပြီဖြစ်သော ကျွန်မ၏ခန္ဓာကိုယ်အထက်ပိုင်းမှာ သိပ်သည်းသောကိုယ်ကြပ် အင်္ကျီလက်တိုကလေးအောက်၌ တစ်တစ်ရစ်ရစ်ဖြစ်နေပါသည်။ အဝေ့အ၀ိုက် အရှိုက်အဖိုတို့သည် လည်ဟိုက်အင်္ကျီအကြားမှ ၀င့်ဝင့်ကြွားကြွားပြနေကြသည်။ အင်္ကျီနှင့်ပိုးသားထဘီ မှီအောင်ဖုံးမထားနိုင်သည့်ကျွန်မ၏ ခါးသား မူကား..ရွှေခါးပတ်အထက်က သူ့လက် ထွာဆိုင်အတွင်းမှာ ၀င်းဝင်းဝါ၀ါရှိနေပါသည်။ ပိုးသားထဘီအောက်တွင်မူ ဆင်နှာမောင်းကဲ့သို့ ဖြောင့်စင်း ရှူးသွယ်သွားကြသည့် ပေါင်တံများကို အထင်းသားလောက်မြင်နေနိုင်သည်။ ကျွန်မ၏အငွေ့၊ ကျွန်မ၏အနံ့၊ ကျွန်မ၏အလှသည် သူ၏ရုပ်ရောနာမ်ကိုပါ မလှုပ်နိုင်အောင်ဆုပ်ကိုင်၍ ဖမ်းလိုက်သည့် ကွန်ယက်တစ်ခုဖြစ်သွားပါတော့သည်။ ဒါဟာကျွန်မအလုပ်ပဲမဟုတ်ပါလား။ " လှလိုက်တာ..သီရိမာ၊ လှလိုက်တာ၊ ဒီနေ့ဒီရက်အထိ သီရိမာကိုမတွေ့ခဲ့ရတာတော့ ကိုယ့်ကိုကိုယ်တောင် ခွင့်လွှတ်နိုင်ကောင်းစရာ မရှိပါဘူး " ကျွန်မ၏တစ်ကိုယ်လုံးကို သိမ်းကျုံး၍ဖက်ပြီး ညည်းညည်းညူညူအငမ်းမရဖြစ်လာပါပြီ။ " လောမကြီးပါနဲ့..မောင်မောင်..၊ တစ်ဆယ့်ငါးရက်သော ကာလပတ်လုံးခြေရင်းမှာ လုပ်ကျွေးဖို့ ငွေပေး ထားတာပြေးသွားမှာ မဟုတ်ပါဘူး " သူ့လက်နှစ်ဖက်ကိုဖြည်၍ ကျွန်မက သလွန်ညောင်စောင်းမှာ ခပ်စောင်းစောင်းလေးထိုင်လိုက်ပါသည်။ သူကရွှေကရားမှ သေအရက်ကိုငှဲ့ပေးရင်း...... " သီရိမာကိုစတွေ့တဲ့ မင်္ဂလာအထိမ်းအမှတ်အဖြစ် သောက်လိုက်ကြစို့လား " ကျွန်မကအလိုက်သင့်ယူလိုက်ပါသည်။ သူ့ရွှေခွက်နှင့်တစ်ချက်ထိလိုက်သည်။ သူနှစ်နှစ်ခြိုက်ခြိုက်မော့ သောက်လိုက်သည်ကိုကြည့်ပြီး ကျွန်မက နှုတ်ခမ်းကိုဆွတ်လိုက်ရပါသည်။ " မောင်မောင်...သေအရက်ကိုနှစ်သက်သလားဟင် " " ဘာဖြစ်လို့မေးတာလဲ သီရိမာ၊ သေအရက်ဆိုတာ နှုတ်မြိန်တယ်၊ ၀မ်းမီးကောင်းတယ်၊ ကိုယ်စိတ်ပေါ့ပါး တယ်လေ၊ အင်အားဗလသန်မာတယ်မဟုတ်လား " ကျွန်မက လက်ထဲကရွှေခွက်ကို လှည့်ပတ်ကြည့်ပြီးမှ ရွှေလင်ပန်းထဲ့သို့အသာကလေးအနုပညာဆန်ဆန် ချထားလိုက်ပါသည်။ နောက်ဆုံးတော့ သူ့မျက်နှာကိုခပ်ပြုံးပြုံး ခပ်ထေ့ထေ့ မျက်လွှာကိုပင့်ကြည့်လိုက်ပါ သည်။ ထိုအကြည့်မျိုးကို မည်သည့်ယောက်ျားမှ ခံနိုင်စွမ်းမရှိ။ " ဘာပြောချင်လို့လဲ သီရိမာ၊ ဘယ်လိုဝေဖန်မှာတုန်း၊ သေအရက်ကိုမုန်းသလား " " မင်းယောက်ျားများအဖို့ ' သူရာဓုတ္တ၊ ဣတ္တိဓုတ္တ ' ရယ်လို့ရှိကြတယ်မလား၊ မိန်းမကိုချစ်တဲ့လူဟာ အရက်ကို မချစ်ရဘူး၊ အရက်ကိုချစ်တဲ့လူဟာလည်း မိန်းမကိုချစ်ရာမရောက်ဘူး " " ဒါဖြင့်အရက်ကိုသောက်ပြီး မိန်းမကိုချစ်တယ်ဆိုရင်ကော " " လူတစ်ယောက်ဟာ ပခုံးတစ်ဖက်ထဲနဲ့ရေအိုးနှစ်လုံးမရွက်နိုင်ဘူးလေ " " ပုခုံးနှစ်ဖက်မှာ ရေအိုးတစ်လုံးစီထားရင်ကော" " ဒီရေအိုးတွေကို လက်ဘယ့်နှယ်ထားပြီး ကိုင်ပါ့မလဲ " " ဟဲ..ဟဲ..ဟဲ..သီရိမာ.....နှုတ်မှုရေးရာလင်္ကာတယ်ဆန်ပါလားကွယ်၊ တချို့ပညာရှိများကတော့ အရက်ကို တစ်ကျိုက်၊ မိန်းကလေးကို တစ်နမ်း၊ ကဗျာသီချင်းတစ်ပုဒ်၊ ဒါကိုပဲ ကာမစည်းစိမ်ဟူ၍ သမုတ်ပါကလား" " ပညာရှိပြောတာမှန်ပါတယ်၊ အရက်ကိုတစ်ငုံတစ်ကျိုက်ကမပိုရင်လေ၊ အဲသည့်နှုန်းနဲ့ဆိုရင် မိန်းကလေး ကိုလည်း တစ်နမ်းလောက်နဲ့ပဲ အာသာဖြေပေါ့၊ ကဗျာသီချင်းကိုလည်း တစ်ပုဒ်ပဲနားထောင်ရမယ်နော် " " သြော်...သြော်..မင်းပြောတာကိုသဘောပေါက်ပါပြီ..သီရိမာ၊ မင်းဟာတကယ်ဆိုတော့ နယူပဒေသ ကထိက ကလေးပါလား " သူက ဟက်ဟက်ပက်ပက်ပျော်ပျော်ရွှင်ရွှင်ရယ်မောနေပါသည်၊ သို့သော် သူ၏ရယ်မောခြင်းသည် ပေါ့ပေါ့ ဆဆ ပြက်ရယ်ပြုခြင်းမဟုတ်ပဲ ကျွန်မအား တကယ်လေးစားလာကြောင်းသိသာနေပါသည်။ ထို့ကြောင့် ကျွန်မဟာလေးလေးနက်နက်စကားကိုဆက်ရပါတော့သည်။ " ဧကဂ္ဂတာဆိုတာ တစ်ခုတည်းသောအာရုံကို အာရုံပြုတဲ့သဘောခေါ်ပါတယ်၊ ဘယ်သတ္တ၀ါဖြစ်စေ၊ တစ်ပြိုင်တည်း စိတ်နှစ်မျိုးမထားနိုင်ကြပါဘူး " " ဟုတ်ပါပြီ...ဟုတ်ပါပြီ၊ ကျုပ်သဘောပေါက်ပါပြီ၊ ဒါပေမယ့် အရက်ဟာ ကာမဂုဏ်အရာမှာ ရသာယန ဆေးစွမ်းကောင်းတစ်လက်ဆိုတာကရော " " အာဂန္တုက ခဏလာလည်တဲ့ ဧည့်သည်ကို တစ်သက်လုံးအားကိုးရမှာလား..မောင်မောင်၊ သေအရက်ထဲ မှာခဏလေးသာ သွေးသားတွေဆူပွက်ပြီ ရမ္မက်ဆိုတာကို နှိုးဆွနိုင်တဲ့ သတ္တိမျိုးပါဝင်ပါတယ်၊ အင်မတန် ချစ်ခင်နှစ်သက်တဲ့ ဧည့်သည်တစ်ယောက်နေရင်းကိုပြန်သွားတော့ ဧည့်သည်မရောက်ခင်ကထက် ပျင်းရိ ခြောက်သွေ့လာတယ်လို့မထင်မှတ်ခဲ့ဖူးဘူးလား၊ ဒီသဘောတရားပါပဲ၊ အာဂန္တုကသတ္တိသြဇာကုန်သွားရင် မသောက်ခင်ကထက် နွမ်းလျမိန်းမောနေတတ်ပါတယ် " " အမယ်လေး....ဓာတုရသ ဘေသဇ္ဇဆရာမလေးရယ် " အားရပါးရချီးကျူးရင်း ကျွန်မ၏တစ်ကိုယ်လုံးကို သိမ်းကျုံးပွေ့ဖက်ယူလိုက်ပါသည်။ " မောင်မောင်နေအုံးလေ၊ သီရိမာ..ဟာသမားတော်ဇီဝကရဲ့နှမဆိုတာမမေ့နဲ့အုံး " " အမယ်လေး..ထူးဆန်းလှချည့်လား..သီရိမာ၊ ဘယ်ပုံတော်စပ်ကြတာလဲ " " ရာဇဂြိုလ်ပြည့်ရှင် ဗိမ္ဗိသာရမင်းကြီးက ခန့်အပ်ထားတဲ့ပြည့်တန်ဆာအမျိုးသမီး သာလ၀တီဟာ သီရိမာရဲ့ မွေးသမိခင်ပါ..မောင်မောင်...၊ သီရိမာကို မဖွားခင်က မယ်တော်နဲ့ဘုရင့်သားတော် အဘယ မင်းသားတို့ ယဉ်ပါးတော်မူကြတဲ့အတွက် ဇီဝကကိုဖွားမြင်ခဲ့ရပါတယ်၊ တကယ်ဆိုတော့ ဇီဝကနဲ့သီရိမာဟာ မအေတူ ဖအေကွဲမောင်နှမလို့ဆိုရမှာပေါ့ " " ကဲ..ကဲ..ဒီလိုဖြင့် ပုရိသယောက်ျား မောင်တို့လိုလောကီသားတွေအတွက် ဆေးကောင်းတစ်လက် ဖော်စပ် ပေးနိုင်ပါ့မလား...သီရိမာ " ကျွန်မက ခပ်လှောင်လှောင်ရယ်သွမ်းသွေးပြီး သူ့မေးစေ့ကိုလက်ညှိုးဖြင့်ပင့်တင်၍ မချိုမချဉ်ကြည့်လိုက် ပါသည်။ " ဒီစိတ်တွေကြောင့် မယားအလှ ဥတ္တရာဟာ အဋ္ဌင်္ဂသီလမဆောက်တည်နိုင်ရှာတာထင်ပါရဲ့နော် " ကျွန်မစကားက သူ့အရှိုက်ကြားကို ကလိ၍ကစားသလိုဖြစ်သွားပါသည်။ " ဟုတ်တယ်လေ၊ ဒါဘာဖြစ်လဲ....၊ မောင်တို့ဖခင်လက်ထက်ကတည်းက ကိုးကွယ်လာတဲ့ နိဂဏ္ဍဆရာကြီး တွေက အရွယ်ကောင်းတုန်း ကာမဂုဏ်ကိုသုံးဆောင်ခံစားပြီး လူအိုလို့ကာမကုန်ခမ်းတဲ့အခါ ရဟန္တာဖြစ်နိုင် တယ်လို့ဆိုထားတာပဲ " " ကာမဆိုတာ လိုချင်တာမှန်သမျှ ကာမလို့ဆိုကြတယ်လေ...မောင်မောင်၊ မလိုချင်ဘူးလို့ဘယ်အခါမှ ရှိပါ့ မလဲ " " ကဲပါကွယ်...မင်းနဲ့ကျုပ်နဲ့ ၀ါဒချင်းပြိုင်ရအောင် ဒီအခန်းထဲယှဉ်ထိုင်နေကြတာမဟုတ်ပါဘူး၊ ဆေးနည်း ကောင်းကလေးများသာ တတ်နိုင်ရင်ဖော်စပ်ပေးစမ်းပါ " " ရသာယနလို့ခေါ်တဲ့ စားဖွယ်တစ်မျိုးတော့အကျိုးအာနိသင်ရှိတာတွေ့ရပါတယ်၊ ရေမထည့်သော ကျွဲနို့မှ ဖြစ်သောစတုတ္ထနို့ဓမ်းခြောက်ဆယ့်လေးပိုလ်၊ ဖြူသောသကြား သုံးဆယ့်နှစ်ပိုလ်၊ နွားနို့တစ်ရာ့နှစ်ဆယ့်ရှစ် ပိုလ်တို့ကို ရောနှောမွှေနှောက်၍၊ မြေအိုးသစ်အ၀တွင် သန့်ရှင်းစင်ကြယ်သောပိတ်ကိုစည်း၍ နှောပြီးသော ၀တ္ထုစုကို အတန်ငယ်စီယူ၍၊ ပိတ်ပေါ်တွင် လေးညှင်း၊ငရုတ်ကောင်းတို့ကိုမီးသင်း၍၊ ၎င်းအမှုန့်တို့ကို မွှေးရုံ မျှခတ်၊ ပရုတ်လည်းစဉ်းငယ်မျှခတ်၊ ၀သန္တဥတုမှတစ်ပါး အခြားသောဥတု၌ အမြဲစားသုံးအပ်၏ ဟု ဆိုပါ တယ်......မောင်မောင်....." " အင်း.....အကျိုးကကောကွယ်...." " အားကိုဖြစ်စေတတ်၏၊ နွေအခါဖြစ်သော ဂိမှန်ဥတု၊သရဒဥတုတို့၌ နေပူဖြင့် နှိပ်စက်ကုန်သော ခြောက် ကပ်ကုန်သောသူတို့သည်လည်းကောင်း၊ မယားများကုန်သောသူတို့သည်လည်းကောင်းသုံးဆောင်အပ် ကုန်၏လို့ညွှန်းပါတယ်..မောင်မောင်......၊ နောက်ပြီး နွားနို့မှဖြစ်သောထောပတ်သည်လည်း ဉာဏ်ပညာ တင့်တယ်ခြင်း၊ ကျက်သရေရှိခြင်း၊ အိုခြင်း၊ နာခြင်းကိုဖျောက်၍ အသက်ရှည်နိုင်၏လို့ ရသာယန အနေနဲ့ ဆိုပါတယ် " " ကျေးဇူးကြီးပါပေ့ ပညာရှင်မလေးရယ်၊ မောင်မောင်ဒီနေ့ကစပြီး သေရည်ကိုမသုံးတော့ပါဘူး၊ ထောပတ်နဲ့ တကွ အလိုရှိသမျှပစ္စည်းတွေကိုမင်းလက်ထဲအပ်ပါ့မယ်၊ မင်းရဲ့ကိုယ်ပိုင်သီးသန့်ခန်းမှာချက်စပ်၍ ပေးပါ လား.....သီရိမာ " " မောင်မောင် အလိုရှိသမျှ ပေးဆပ်ရမယ့် တာဝန်ရှိသူပါ...သူဋ္ဌေးမင်းရယ် " သူကအမြတ်တနိုးရင်ခွင်တွင်းမှာပွေ့လျက် တင်းတိမ်ကာထားသော သဉ္ဇာလီဘက်သို့ကျွန်မကိုဆောင်ယူ သွားပါသည်။ ထိုအခိုက် တိုက်အောက်ထပ်အိမ်ရှေ့ခန်းဆီမှ ရုတ်ရုတ်သဲသဲမသဲမကွဲအသံကိုကြားလိုက် ခြင်းကြောင့်...... " ဘာသံတွေလဲ မောင်မောင် " ဟုအထိတ်တလန့်မေးမိသည်။ " အိုကွယ်....ဗုဒ္ဓကြွလာချိန်နီးလို့ ဥတ္တရာတို့ပြင်ဆင်ကြတာပေါ့ " ကျွန်မစိတ်ထဲဝယ် ထိတ်ခနဲတော့ဖြစ်သွားပါသည်။ ကိလေသာအာရုံ ကာမဂုဏ်တို့ကို သုတ်သင်တော်မူနေ သောဗုဒ္ဓနှင့်တစ်တိုက်တည်းအတူရှိနေလျက် ကျွန်မမှာတော့ ကိလေသာပွားအောင် ယောက်ျားတစ် ယောက်ကိုအမှောင်ထဲဆွဲသွင်းနေရပါတကား- ဟုရှက်စနိုးဖြစ်နေချိန်တွင် သူကကျွန်မကိုငုံ့၍ပြော လိုက်သည်။ " ဧကဂ္ဂတာ ဆိုတာ တစ်ခုတည်းသောအာရုံလို့ သီရိမာပြောခဲ့ဖူးတယ်နော် "
************************************************************************** နန္ဒသူဋ္ဌေး၏ ရင်ခွင်ထဲရောက်သည်မှာ သီတင်းနှစ်ပတ်ကြာလွန်ခဲ့ပါပြီ။ ရေမိုးသုံးသပ်ရန်၊ နံ့သာခြယ်သရန် အ၀တ်အစားလဲလှယ်ရန် ကျွန်မကိုယ်ပိုင်အခန်းကို နေ့စဉ်ကကဲ့သို့ပြန်လာခဲ့သည့်အခိုက်၊ ယနေ့မှာတော့ ဘာတစ်ခုမှ မယ်မယ်ရရမလုပ်ဖြစ်သေးပဲ ခေါက်တုန့်ခေါက်ပြန် လမ်းသလားရင်းစဉ်းစားနေမိသည်။ သမေဏန သမဏော၊ ဂေါဏေန ဂေါဏော။ မှန်ပါသည်။ ကိလေသာ ခေါင်းပါးသူနှင့်တရားကျင့်သူတို့သည် အပေါင်းအဖော်ဖြစ်နိုင်သကဲ့သို့၊ ရာဂထူ ပြောသည့် နွားသိုးကြိုးပြတ်နှင့် နွားငတ်ရေချတို့မှာ အလွန်အင်ပြေသော မိဿက ဖြစ်နေပါ၏။ နေ့စဉ်နှင့် အမျှ ဗုဒ္ဓဝေယျာဝစ္စဖြင့် အဋ္ဌင်္ဂသီလမြဲနေသော ဥတ္တရာနှင့် ကာမဘောဂီ၊ လောကီဘုံသား နန္ဒတို့ စည်းဝါး မကိုက်ရှေ့သွားနောက်လိုက် မညီသည်မှာ သဘာဝအတိုင်းဖြစ်ပါသည်။ ကျွန်မနှင့်နန္ဒအဖြစ်မှာတော့ သံလိုက်နှင့်အပ်သွားကဲ့သို့ရှိပါသည်။ တစ်ဖက်သား၏ ရမ္မက်အားကို ဖြားယောင်းသွေးဆောင်သိမ်းသွင်းရသည်မှာ ပြည့်တန်ဆာမ၏ လုပ်ငန်းမျှသာဖြစ်၍ သံလိုက်နှင့်ပမာတူ ပါသည်။ သို့သော် သံလိုက်ကမြှူ၍ အပ်သွားကပြေးကပ်သောအခါ ထိုအပ်သွားကို သံလိုက်က ပြန်၍ ဆုတ် ခွာတွန်းလှန်ခြင်းမပြုနိုင်ပေ၊ အငင်အားသာစွမ်း၍ အနှင်အားမစွမ်း၊ အပ်သွားကပ်နေသလောက် သံလိုက်က အကပ်ခံနေရမည်ဖြစ်ပါသည်။ တစ်နည်းဆိုသော် သံလိုက်ကပင် အကွာမခံချင်သည့် သဘာဝဓမ္မ မဟုတ် ပါလော။ ကျွန်မစိတ်ကို ကျွန်မသိပါသည်၊ ကျွန်မ နန္ဒကို တစ်ကယ်နှစ်နှစ်ကာကာချစ်နေမိပါပြီ။ ဥတ္တရာအား ကျွန်မ သစ္စာဖောက်နေပါပကော၊ ယခု ကျွန်မဘ၀ကို ဖောက်လွဲဖောက်ပြန်လုပ်ရမည်လား။ ကျွန်မသစ္စာဖောက်ခြင်းမဟုတ်ပါ၊ အဘယ်ကြောင့်ဆိုသော ပြည့်တန်ဆာအဖြစ်က သာမန်ဇနီးမယားအဖြစ် သို့ တောင့်တလာခြင်းသာဖြစ်ပါသည်။ နန္ဒနှင့်တွေ့လိုက်ခြင်းသည် တကယ့်တကယ်အိမ်ယာတည်ထောင် သည့် လင်ချစ်၊မယားချစ်၊ အချစ်စစ်အချစ်မှန်ကို သရုပ်သကန်ထင်ရှားလာပါသည်။ ဇနီးမယားအဖြစ်၊ သမီး သားတွေကိုချစ်လာချင်ပါသည်။ ကိုယ့်လင်ကိုယ့်သား ကိုယ့်အိုးကိုယ့်အိမ်နှင့်တင့်တင့်တယ်တယ် ထည် ထည်ဝါ၀ါ နေလိုခြင်းမှာ မိန်းမတို့၏ ဓမ္မတာဖြစ်ရာ၊ ပြည့်တန်ဆာစိတ်ထား....ပြည့်တန်ဆာ၏ဘ၀ကို ရွံမုန်း စက်ဆုပ်လာခဲ့ရပါပြီ။ သန့်ရှင်းသော လူ့လောက၀ယ် ပြည့်တန်ဆာ ဟူသည်ကား မလိုလားအပ်သော ဆူးငြောင့်များပါပေ။ ယခု ကျွန်မဖြစ်ရသောဘ၀ကား ကျွန်မရဲ့ကိုယ်ကအများပိုင်ဖြစ်ပါသည်။ ပုဂ္ဂလိက တစ်ဦးတစ်ယောက် အတွက်သာမဟုတ်၊ ရာဂ၏သောင်းကျန်းမှုသည် မေတ္တာ၏ကြင်နာမှုနှင့် ဆီနှင့်ရေ ကွာသလိုကွာကြောင်း ရက်ရှည်ပေါင်းလာရသဖြင့် ကောင်းကောင်းကြီးရိပ်မိရပါတော့သည်။ " ကျွန်မ ဘာလုပ်ရမလဲ၊ ဘာများကော တတ်နိုင်ပါသေးသလဲ " မျက်နှာကို လက်နှစ်ဖက်နှင့်အုပ်၍ တရှုပ်ရှုပ်ငိုချလိုက်မိသည်။ ယောက်ျားတကာ၏ အာသာငမ်းငမ်း စွဲလမ်း တပ်မက်မှုသည် ကိုယ်ပိုင်လင်သား၏ ကရုဏာတရားလောက် လေးလေးပင်ပင်အရသာမရှိပါတကား။ ကျွန်မအားရအောင်ငိုပြီးသည့်နောက် ပြတင်းပေါက်သို့အမှတ်မထင်သွားရပ်နေလိုက်သည်။ ဗုဒ္ဓဝေယျာဝစ္စ ဖြင့် ကျေးကျွန်အမှုထမ်းများအား တပင်တပန်း ပြောဆိုခန့်ခွဲနေသည့် ဥတ္တရာ၏အသံကို ကြားလိုက်ရသည်။ သူ့မှာ ကြည်ကြည်လင်လင်ပျော်ပျော်ပါးပါးနှင့် ကျွန်မရပ်နေရာပြတင်းပေါက်အောက်တည့်တည့်မှာရှိသည်။ ကျွန်မကသူ့ကိုပင် မလိုတမာဖြစ်လာရသည်။ တဏှာပေမနှင့် မဆက်ဆံဘူးထား၊ သူ့မှာအဖိုးတန် လင်ယောက်ျားရှိသေးသည်။ ကျွန်မတွင်ယောက်ျားတွေအများကြီးရှိလျက် လင်အဖြစ်နှင့်တစ်ယောက်မှ မရခဲ့။ နက်ဖြန်ဆယ့်ငါးရက်ပြည့်လျှင် လင်သားကင်းမဲ့သော အိမ်သို့ပြန်၍ စက်ဆုပ်ဖွယ်ဝဲသြဃ၌သာလည်နေရ မည်။ အကယ်၍ ဥတ္တရာသေပြီး..ငါသာ နန္ဒ၏တရားဝင်ဇနီးဖြစ်ရလျှင်............ ဆက်၍ မတွေးဝံ့တော့ပဲ သူ့ကိုကြည့်ရာကမျက်နှာလွှဲလိုက်ရသည်။ ကျွန်မ၏မျက်စိရောက်သွားနေရာကား အခန်းထဲတွင် ရသာယန ဆေးအတွက်ကျိုချက်ထားသော ထောပတ်အိုးဖြစ်သည်။ မီးကျည်းခဲရဲရဲတောက် နေသော မီးဖိုပေါ်တွင်ထောပတ်က ပွက်ပွက်ဆူလျက်ရှိသည်။ တစ်ပိဿာလောက်ရှိသော ကျိုက်ကျိက်ဆူ နေသည့် ထောပတ်အပူသည် လူတစ်ယောက်၏ အသက်ဇီဝကိုတစ်ခဏချင်းဖြုတ်ခြွေနိုင်ကြောင်း ကျွန်မ စဉ်းစားမိလိုက်သည်။ ထိုအခိုက်ကလေးမှာ ဘီလူးသရဲစိတ်ဝင်၍ ဥတ္တရာအား ငုံ့ကြည့်လိုက်ပြန်သည်။ွှဤအခါတွင် ဥတ္တရာက အမှတ်မထင်ကျွန်မကိုမြင်၍ ပြုံးပြလိုက်သည်။ သူ့အပြုံးမှာ အလွန်ကြည်လင်သန့် ရှင်းလှသောကြောင့် ကျွန်မ၏ဦးခေါင်းကို တူနှင့်နှက်သလို ခံစားလိုက်ရသည်။ ကျွန်မအမုန်းကို သူ၏အပြုံး ကတိုက်ခိုက်လိုက်ခြင်းဖြစ်ဟန်တူပါသည်။ " ဒင်းက အခုအထိ ငါ့ကိုအနိုင်ယူထားတုန်းပါကလား " ကျွန်မဘာမှမစဉ်းစားနိုင်တော့ပါ၊ မီးဖိုပေါ်က ကျိုက်ကျိုက်ဆူနေသော ထောပတ်အိုးကို သတိကြီးစွာဖြင့် သယ်ယူလာပြီး ဥတ္တရာခေါင်းပေါ်သို့လောင်းချလိုက်ပါတော့သည်။ " အမယ်လေး...ဘယ့်နှယ်လုပ်လိုက်တာတုန်း " ဟုဝိုင်းအော်ကြသောအသံကို ကြားလိုက်ရပါသည်။ ဥတ္တရာ ၏အသံကိုကား လုံးဝမကြားရတော့။ မကြာခင်တိုက်အတွင်းရှိလူအကုန်ရုတ်ရုတ်သည်းသည်းဖြစ်သွားကြသည်။ တိုက်ပေါ်သို့ပြေးတက်လာကြ သောဆူဆူညံညံအသံတွေကြားရသည်။ ကျွန်မ၏ အခန်းတံခါးကို အတင်းဖွင့်၍ယောက်ျား၊မိန်းမများစွာက ကျွန်မကို ဆွဲထုတ်သွားကြပါသည်။ ဟစ်အော်ဆဲရေး၍ ရိုက်ပုတ်နှိပ်စက်ကြပါသည်။ ကျွန်မ၏ မနောကံ မြန်ဆန်သလောက် ကာယကံကပါသွားပြီးလျှင် ယခုကျွန်မအရိုက်အနှက်ခံရသည့်အခါ မတ္တကလေးအထိ ဘာမျှကြာလိုက်သည်မဟုတ်။ နန္ဒကဘုမသိ၊ဘမသိနှင့်အလန့်တကြား သူ့အခန်းမှထွက်၍တားလိုက်သည်။ " ဟဲ့ - ဟဲ့...သီရိမာကိုဘယ်လိုပြုနေကြတာလဲ " " မဟုတ်ဘူးအရှင့်သား၊ သူ သခင်မကိုထောပတ်ပူတွေနဲ့လောင်းချတယ်၊ သူသေကြောင်းကြံတဲ့မိန်းမယုတ်" " ဟင်.....ဥတ္တရာ..သေရှာပလား " နန္ဒ၏ ကရုဏာအသံသည် ကျွန်မ၏ဘ၀မှန်သို့ချက်ချင်းပြန်ပို့လိုက်ပါသည်။ ငါကား အခစား ပြည့်တန်ဆာ မျှသာဖြစ်၍ ဥတ္တရာကား နန္ဒ၏ ကြင်ရာသက်ထား တရားဝင်ဇနီးမယားပါတကား။ ဇင်္ဂမ မယားက ထာဝရ မယားဖြစ်လိုဖြစ်ငြားပြုမိမှားသည့်တိုင်အောင် နန္ဒ၏မေတ္တာစစ်ကား ငါ့အပေါ်မှာမဟုတ်၊ ဥတ္တရာပင်ဖြစ် ကြောင်းကျွန်မသိရပါလေပြီ။ " ဟဲ့ - ဟဲ့...ငါ့ခင်ပွန်းမကိုအန္တရာယ်အပြုကြပါနဲ့...ဖယ်ကြ..ဖယ်ကြ.." ပြေးဝင်လာသော ဥတ္တရာကိုကြည့်၍ ကျွန်မလန့်၍များပင်သွားသည်။ သူ့တစ်ကိုယ်လုံးမှာ ထောပတ်ပူများ နှင့်ရွှဲစိုနစ်လျက်ရှိသော်လည်း ထိုအပူသည် သူ၏ မေတ္တာရေချမ်းကိုမလွှမ်းနိုင်ကြောင်း ဒိဋ္ဌ တွေ့လိုက်ရ သည်။ အံ့သြဘနန်းပါလား။ ထောင်းထုရိုက်ပုတ်၍ ပျော့ခွေနေသော ကျွန်မကို ဥတ္တရာက ၀င်၍ပွေ့ထူလိုက်သည်။ " သူမတော်တဆပြုမိတာဖြစ်မှာပါကွယ် " ဟုဒေါသဖြစ်နေသောသူများအား နှစ်သိမ့်လိုက်သည်။ " မဟုတ်ဘူး..သခင်မ၊ သူ ကျကျနန လောင်းလိုက်တာ ကျွန်မတို့တွေ့ရတယ် " " ကဲ - ကောင်းပြီ၊ ထားပါတော့၊ ငါ့မှာမှ အန္တရာယ်မဖြစ်ပဲ၊ စိတ်မဆိုးကြပါနဲ့၊ သူ့ကျေးဇူးတွေတို့ခံစားရတယ် မဟုတ်လား၊ သူလာပြီး အရှင့်သားကိုပြုစုဖော်ရလို့ တို့တစ်တွေမှာ ၀ိတက်၊၀ိစာရတွေရှင်းရှင်းနဲ့ ဗုဒ္ဓ ကိုယ်တော်မြတ်ကို ဆွမ်းလုပ်ကျွေးနိုင်ကြတာမဟုတ်လား၊ ကြည့်စမ်းပါဦးကွယ်၊ သူ့ခမျာ ဒဏ်ရာတွေတောင် ရနေပါပြီ " ကျွန်မကိုယ်ပေါ်မှ ဒဏ်ရာဒဏ်ချက်များကိုပင် ကိုယ်တိုင်ဆေးဝါးလိမ်းကျံပေးရှာသည် ။ ဥတ္တရာ၏ အပြုအမူ နှင့်အယုအယတို့သည် ထောင်းထုပုတ်ခတ်သော ဒဏ်ချက်တွေထက် ကျွန်မအသဲကို ၀မ်းနည်းကြေကွဲစေ ပါသည်။ နန္ဒကလည်း ကျွန်မကိုတစ်ချက်ကြည့်၍ အပါးမှလှည့်ထွက်သွားပါပြီ။ ဟုတ်ပါသည်။ သူ့မယား အပေါ်ရက်စက်မှုကြောင့် ကျွန်မကိုစက်ဆုပ်သွားပါပကော။ ကျွန်မ၏ရင်တွင်းဝယ် မဟာသမုဒ္ဒရာက လှိုင်းတံပိုးကြီးများရိုက်ခတ်သလို မိုက်မဲပြစ်မှားမှုနောင်တလှိုင်းလုံး ကြီးများက ရိုက်ခတ်နေပါသည်။ ကျွန်မမျက်ရည်သည် နွေလအခါ ဟိမ၀န္တာမှ ဆီးနှင်းခဲများအရည်ပျော်ကျ သလို ကျခဲ့ရပါပြီ။ " ကျွန်မမှားပါပြီ အစ်မကြီးရယ်၊ သူတော်ကောင်းမကြီးရယ် " " မငိုပါနဲ့ညီမ...မငိုနဲ့၊ ပုထုဇဉ်ဆိုတာ ရာဂပွားသလောက် မှားကြတာပါပဲ " " အစ်မကြီး ကျွန်မအပေါ်မှာခွင့်လွှတ်နိုင်တာ အံ့သြမိပါတယ် အစ်မကြီး " "ညီမလေးကလည်း တစ်နေ့ကျရင် ခွင့်လွှတ်နိုင်တတ်လာပါလိမ့်မယ်ကွယ် " " ကျွန်မကို မုန်းတီးစက်ဆုပ်သွားတော့မှာပေါ့နော် " " ညီမကိုမုန်းလိုက်ရင် ထောပတ်ပူတွေက တစ်ကိုယ်လုံးနှိပ်စက်တော့မှာပေါ့၊ အခုအစ်မကြီးမှာ ဘာမှမဖြစ် တာ ကြည့်ပါလား၊ ဒါဟာ ညီမကိုမမုန်းတဲ့ အထင်ရှားဆုံးသက်သေပါကွယ် " ကျွန်မက သူ့ကိုအားရပါးရဖက်၍ငိုလိုက်ရသည်။ သို့ကလိုမှကျွန်မအပူသက်သာသည်ဟု ထင်ရသည်။ ဆီပူ လောင်းချသူမှာ ကျွန်မဖြစ်သည်၊ ထိုအပူလောင်မြှိုက်ခြင်းခံရသူကား သူမဟုတ်၊ ကျွန်မပင်လျှင်တည်း။ အပြင်ခန္ဓာကိုသာလျှင်မက ကျွန်မ၏နှလုံးသားကို ဆီပူနှင့်အကြော်ခံရသည့်နှယ်။ " ကျွန်မမိုက်ပြစ်ကြီးကို အစ်မကြီးက သည်းခံပေမယ့် အကုသိုလ်က သည်းခံပါတော့မလား၊ ကျွန်မကြောက် လှချည်ရဲ့ " " အကုသိုလ်ကံက သည်းခံနိုင်အောင် အဖဗုဒ္ဓရှိပါတယ်ကွယ်၊ ကိုယ်တော်မြတ်ထံမှာ တောင်းပန်လျှောက် ထားပါ၊ တရားရေအေးတိုက်ကျွေးတော်မူပါလိမ့်မယ် " " ဗုဒ္ဓက ......ဗုဒ္ဓက..ပြည့်တန်ဆာမကို လက်ခံမှာတဲ့လား၊ ကျွန်မရဲ့ဆွမ်းကိုဘုဉ်းပေးမှာတဲ့လား၊ ကျွန်မကို မစက်ဆုပ်မရှောင်ဖယ်ပေဘူးလား၊ ကျွန်မကိုအပြစ်မတင်ပေဘူးလား..အစ်မကြီးရယ် " " မိုက်ပါဘိ..ညီမရယ်၊ ဝေနေယျကို ရင်၌ဖြစ်သောသားကဲ့သို့သနားတော်မူတဲ့ မဟာကရုဏာရှင်ကြီးပါကွယ်၊ မမပြောဖူးတယ်လေ..မေ့သွားပလား၊ ပြည့်တန်ဆာမဖြစ်ခဲ့တဲ့ အမ္ဗပါလီအမျိုးသမီးကိုတောင် ရဟန်းမိန်းမ အဖြစ်လက်ခံတော်မူသေးတာပဲ၊ နောက်ပြီး မမညီမကိုပြောခဲ့တာကော၊ မမကိုယ်စားသူဋ္ဌေးလေးကို လာရောက်ပြုစုတာဟာ ငါ့ညီမအတွက် ကောင်းမှုကုသိုလ် အထောက်အပံ့ဖြစ်ပါလိမ့်မယ်လို့...... ကဲ..ကဲ.. ထ ပါကွယ်...ထပါ.....ထပါ "
************************************************************************* မှန်ပါသည်။ နန္ဒအား သူ့ကိုယ်စားဆောင်ရွက်ပေးမှုက ကျွန်မအတွက် ကုသိုလ်အထောက်အပံ့ဖြစ်ပါလိမ့် မည်ဆိုသော စကားက အမှန်ကြီးမှန်နေပါလေပြီ။ ယခုဗုဒ္ဓမြတ်စွာအားလုပ်ကျွေးရန် ငါးရာသောဆွမ်းပွဲကို ကျွန်မက ဦးဆောင်၍ အခြွေအရံငါးရာဖြင့် ကျွန်မ အိမ်မှတကူးတကသယ်ခဲ့ပါသည်။ သူဋ္ဌေးနန္ဒထံ ခစားရန်လာစဉ်က မြင်းဖြူလေးကောင်..က..သောရထား ပေါင်းချုပ်ကိုစီး၍ လျှပ်ပေါ်လော်လီသည့်စိတ်နှင့် ကိုယ်တွင်မွမ်းမံခြယ်သ လှသထက်လှအောင် မာန ဆောင်လာခြင်းမျိုးဖြစ်သော်လည်း၊ ယခုတစ်ခေါက်မှာကားနှိမ့်ချကျိုးနွံသောစိတ်၊ ၀င့်ဝါတက်ကြွမှုမရှိသော ကိုယ်၊ ပကာသနမဆန်သော အ၀တ်တန်ဆာတို့ဖြင့် ခြေလျင်သာလာခဲ့ခြင်းဖြစ်ရာ တစ်ရက်အတွင်းထူးခြား လာသော မိမိ၏ အဖြစ်ကိုနှစ်ထောင်းအားရကျေနပ်သကဲ့သို့ လမ်းသွားလမ်းလာရာဇဂြိုလ်လူထုကပင် ကျွန်မကိုကြည့်ရင်း ရင်သပ်ရှုမောအံ့သြနေရပါသည်။ ကျွန်မမှာကား ဗုဒ္ဓနှင့်ရင်ဆိုင်ရမည်ကို တထိတ်ထိတ်။ ဥတ္တရာထံရောက်၍ ဆွမ်းပွဲများကို သူ့ကိုအပ်လိုက်ပါသည်။ သူက သာဓုသုံးကြိမ်ခေါ်၍ ကြိုလင့်သည်။ သူ့ မေတ္တာကား တကယ့်အထုအထည်ကြီးမားပါပေသည်။ ကျွန်မအားဆက်ဆံပုံမှာ သူတော်ချင်းချင်း သီတင်း လွေ့လွေ့ပေါင်းဖက်တွေ့လိုက်ရသကဲ့သို့ပင်၊ ထိုအတွက် ကျွန်မတစ်အားတက်ရပါသည်။ မကြာမတင် ငါးရာသော ရဟန်းတို့အား အမှူးပြု၍ ဥတ္တရာ၏ အိမ်ရှေ့ခန်းသို့ကြွလှမ်းဝင်လာသော ဗုဒ္ဓ မြတ်စွာဘုရားအားဖူးမြင်လိုက်ရပါတော့သည်။ လူအပေါင်းက တိတ်ဆိတ်လျက် လက်စုံမိုးနေကြရာ ဗုဒ္ဓ၏ အဆင်းက တိုက်ကြီးခန်းမတစ်ခုလုံးကို အလင်းရောင်ဟပ်လိုက်သကဲ့သို့ရှိပါသည်။ ဗုဒ္ဓ၏ အဆင်းကိုမြင်လျှင် မြင်ချင်း နန္ဒက ကျွန်မကိုပြောသောစကားကိုသွား၍သတိရပါသည် " လှလိုက်တဲ့သီရိမာရယ်၊ ဒီနေ့ဒီရက်အထိ သီရိမာကိုမတွေ့ပဲ နေခဲ့ရတာတော့..ကိုယ့်ကိုကိုယ်တောင် ခွင့် လွှတ်နိုင်ကောင်းစရာမရှိဘူး " ယခုကျွန်မက ကိုယ့်ကိုကိုယ် ကျိန်ဆဲမိပါပြီ။ " ဗုဒ္ဓမြတ်စွာကို ဒီနေ့ဒီရက်အထိ မဖူးတွေ့ပဲနေခဲ့တာတော့ ကိုယ့်ကိုကိုယ်ခွင့်လွှတ်နိုင်ကောင်းစရာ မရှိပါဘူး သီရိမာရယ် " ပြည်သူတို့နှလုံးကို ယူကျုံးဆွဲငင်နိုင်အားရှိသည်ဟုထင်ခဲ့သော ကျွန်မအလှမှာ မြင်သူကို ရာဂဆူပွက်၊ မီး အလျှံတွေတက်စေသော အလှမျှသာဖြစ်ပါသည်။ ဗုဒ္ဓ၏ အဆင်းတော်ကတော့ ဆူပွက်သော မီးလျှံမီး တောက်ကိုပျောက်စေကွယ်စေ၊ ငြိမ်းအေးစေသော ရေကြည်ချမ်းမြ အလှမျိုးပါတကား။ ယခုမှ " အဖဘုရား " ဟုဥတ္တရာက တင်စားခေါ်ဝေါ်ခြင်းကိုသဘောပေါက်ရပါတော့သည်။ ဆရာလိုကြည်ညို ၍၊ ဖအေလိုချစ်ဖွယ်သော ရူပနိကာယ်ပိုင်ရှင်ကြီးပါတကား၊ ထို့ကြောင့် မွေးသဖခင်ကျေးဇူးရှင်၏ မေတ္တာကို ယုံမှတ်အားကိုး ရဲဝံ့စေသကဲ့သို့ ကျွန်မက သံဃအလယ်လူပုံအလယ်တွင် ပြတ်သားရဲဝံ့စွာ လျှောက်ထား လိုက်ပါသည်။ " ဘုန်းတော်အနန္တ အဖရှင်တော်ဘုရား၊ တပည့်တော်မသည် ခင်ပွန်းကောင်းဥတ္တရာအား ယမန်နေ့ကပင် မပြုကောင်း၊မပြုရာ ထောပတ်ဆီပူလောင်း၍ သေကြောင်းကြံခဲ့မိပါသည်ဘုရား၊ ထိုအပြစ်များမှ ချမ်းသာရန် ဘုရားမြတ်စွာအား တပည့်တော်မက နောင်တကြီးစွာဖြင့်လျှောက်ထားခွင့်ပန်ရပါသည် ဘုရား " ဗုဒ္ဓသည် ကျွန်မ၏လျှောက်ထားချက်ကို သည်းခံခွင့်လွှတ်တော်မူကြောင်း ဆိတ်ဆိတ်နေခြင်းဖြင့် ဥပေက္ခာ ပြုတော်မူသည်၊ အတန်ကလေးကြာမှ အင်္ဂါရှစ်ပါးနှင့်ပြည့်စုံတော်မူသော အသံဖြင့်.... " ချစ်သမီး သီရိမာ၊ သူတော်ကောင်းကိုပြစ်မှားခြင်း၌ ကြီးမားသောအပြစ်ရှိသည်ဟု မှတ်လေလော့ " ဗုဒ္ဓက ကျွန်မအား ' ချစ်သမီး' ဟုခေါ်လိုက်ပါသည်။ ဤသို့အခေါ်ခံရခြင်းပင်လျှင် ကျွန်မတစ်ကိုယ်လုံး ကြက်သီးမွေးညှင်းထသွားပါသည်။ ကျွန်မကျေနပ်ပါပြီ။ ကျွန်မဘ၀တစ်လျှောက်လုံး ညစ်ညူးခဲ့သမျှ စိတ်ဓာတ်ကျနေသမျှ ယခုအားရကျေနပ်ပါလေပြီ။ " ချစ်သမီး ဥတ္တရာ၊ သီရိမာသည် ကျိုက်ကျိုက်ဆူသော ထောပတ်နှင့်လောင်းသောကာလ အသို့နှလုံးရှိ သနည်း" ဟုမေးတော်မူလေသည်။ " တပည့်တော်မကား သီရိမာကြောင့် ဒါန၊ သီလကိုပြုခွင့်ရပေသည်၊ ကိုယ်တော်မြတ်ကို ဖူးခွင့်ရပေသည်၊ တရားတော်ကို နာခွင့်ရပေသည်၊ ဤသီရိမာကား ကျေးဇူးရှင်ပေတည်းဟု လွန်စွာချစ်ကြည်သော မေတ္တာ ဓာတ်ဖြင့်သာ ခံနေပါသည်ဘုရား" " သာဓု သာဓု သာဓု ဥတ္တရာ၊ ကြမ်းကြုတ်ခက်ထက်စောင်းမာန်အမျက်ကြီးသူကို အမျက်မရှိခြင်းဖြင့် အောင်နိုင်ရာ၏၊ သူတော်မဟုတ် အကျင့်ယုတ်သူကို သူတော်အကျင့်ဖြင့် အောင်နိုင်ရာ၏၊ ၀န်တိုစဉ်းလဲ စေးနှဲသူကို စွန့်ကြဲပေးကမ်းလှူဒါန်းခြင်းဖြင့် အောင်နိုင်ရာ၏၊ ချွတ်လွဲဖောက်ပြန် မမှန်စကားဆိုသူကို သစ္စာ စကားဖြင့် အောင်နိုင်ရာ၏ " ကျွန်မသည် မျက်ရည်တတွေတွေကျသည်အထိ ပီတိအဖြစ်ကြီးဖြစ်ရပါသည်။ ဤမျှသော တရားအစုဖြင့်ပင် ကျွန်မစိတ်ကိုကျွန်မလှစ်ခနဲသိလိုက်ပါသည်။ အယူအဆအလွဲအများတို့ကို ဒိဋ္ဌသိလိုက်ခြင်းနှင့် မြွေသတ္တ၀ါ ကဲ့သို့ အဟောင်းကို ကွင်းလုံးကျွတ်စွန့်ခြင်းဖြင့် သိမ့်ခနဲတုန်သွားပါသည်။ မြတ်စွာဗုဒ္ဓ၏ တစ်ခုတည်းသောတရားကို ပိုင်နိုင်ရဲရင့်စွာ သုံးသပ်နိုင်လိုက်သည်။ ထိုမှတစ်ပါးသောယုံကြည် အပ်သောတရားသည် အဘယ်မှာမှ မရှိဟု ပြတ်ပြတ်သားသားသိလိုက်ပါပြီ။ ကျွန်မ၏စိတ်မှာ ဓမ္မအရသာကို သန့်ရှင်းစင်ကြယ်တိကျစွာမြူးကွန့်ကျက်စားနေပါသည်။ နေရောင်ဟပ် သော ထက်ကောင်းကင်က တိမ်ဖြူလွလွသည် အဆုံးအစမရှိ ပကတိဖြူဆွတ်ပေါ့ပါးနေသည့်အလားပင်။ " သာဓု သာဓု သာဓု သီရိမာ၊ သင်ချစ်သမီးကား အရိယာမဂ်အယဉ်သို့ ပထမအဆင့်ဆိုက်ရောက်ခိုဝင်ပြီး ဖြစ်ပေပြီ " ဗုဒ္ဓ၏စကားသည် ဥတ္တရာတို့တိုက်ကြီးတစ်ခုလုံး ဥက္ကောဋေယျ လှုပ်လှုပ်ရွရွ ဖြစ်သွားကြောင်း ကျွန်မ ကောင်းကောင်းသတိထားလိုက်မိပါတော့သတည်း။ ကျွန်မမျက်ရည်ကား ရွှဲရွဲစိုလျက်။ (နန္ဒမာတာဥတ္တရာ ထေရီအပဒါန်)
Credit - စာရေးဆရာကြီး (ဦး)သုခ ၏ အကျော်ဒေးယျဗုဒ္ဓသမီးတော်များ စာအုပ်ထဲမှ " ပြည့်တန်ဆာမကလေး" ဆိုသောအပုဒ်ကိုပြန်လည်ရိုက်နှိပ်ဖော်ပြခြင်းဖြစ်ပါသည်။
စာလုံးပေါင်းမှားယွင်း မှုရှိခဲ့ပါက..ထိုအမှားသည် မူရင်းစာရေးဆရာနှင့်လုံးဝမသက်ဆိုင်ပဲ..ကျွန်ပ်၏အမှားသာဖြစ်ပါမည်။
အားလုံးကိုချစ်ခင်လေးစားစွာဖြင့်
**တွတ်တွတ်**
၁။ နစ္စ = အကမျိုးစုံကိုယ်တိုင် 'က' တတ်ရပါမယ်။ သူတစ်ပါးကိုလည်းသင်ပြနိုင်ရမည်။
၂။ ၀ါဒန = အတီးအမှုတ်မျိုးစုံ တီးခတ်နိုင်ရမယ်။ ဒီအထဲမှာ ဂီတသီချင်းသီဆိုမှုလည်း အကျုံးဝင်ပါသည်။
၃။ ဝတ္တာလင်္ကာရ သန္ဓာန = လူတို့နှင့်သင့်လျော်အောင် အခါရာသီအလိုက် အ၀တ်တန်ဆာကို ဆင်ယင် ပေးမှု၊ ကိုယ်တိုင်လည်းဆင်ယင်တတ်မှု။
၎။ အနေကရူပ၀ိဘာဂ ကရဏ = ရုပ်နှင့်လိုက်အောင် အမှုန်းအခြယ် အပြင်အဆင် (အခုခေတ်အခေါ်တော့ မိတ်ကပ်ပေါ့)
၅။ သေယျတ္ထရဏာဘိသံယောဂပုပ္ဖါဒိဂန္ထရ = အိပ်ရာခုတင် စသည်တို့ကို တင့်တယ်အောင် စီရင်ခြင်း၊ ပန်းပွင့်ပန်းနွယ်များကို တင့်တယ်အောင်ပြုပြင်ခြင်း။
၆။ အနေကကီဠာရဉ္ဇန = လူအမျိုးအမျိုးတို့အား ကလူကျီစယ်ခြင်းဖြင့် နှစ်သက်စေမှု။
၇။ အနေကာသန သန္ဓာနရတိဇာနန = (ပြောပါရစေတော့...ဦးနှင့်ဆံနှင့်ကန်တော့ပါရဲ့) နေရာအမျိုးမျိုးတို့၌ နည်းအမျိုးအမျိုးဖြင့် မွေ့လျော်ပုံတို့ကို သိသောအတတ်။
၈။ မဇ္ဇာသ၀ါဒိကရက = သေရည်သေရက် အမျိုးမျိုးတို့ကို ပြုလုပ်ရောစပ်မှု၌ လိမ္မာခြင်း။
၉။ သလဟာရဏ၀ဏာဝိဇ္ဈန = ဒဏ်ရာ (လေးမြှားကျည်ဆန်)တို့ကို ခွဲစိတ်ကုသခြင်း။
၁၀။ အနာဒိပစန = အချက်အပြုတ်အမှန်သမျှ ကျွမ်းကျင်လိမ္မာသော စားဖိုအတတ်။
၁၁။ စိတ္တာဒျလေခ = ပန်းချီပညာ။
၁၂။ ဒုဒ္ဓဒေါဟာဒိဝိညာန = နို့ထောပတ်တို့ကို စီရင်တတ်ခြင်းအတတ်။
၁၃။ ကဉ္စနကာဒိသဗ္ဗန = အင်္ကျီအ၀တ်အစားတို့ကို လှပဆန်းကြယ်အောင် ချုပ်လုပ်ခြင်း။ ၁၄။ ဂေဟဘဏ္ဍဘဇ္ဇန = အိမ်တွင်းတန်ဆာဆင်နည်း၊ ပရိဘောဂ ထားသိုနည်း။
၁၅။ မနောနုကုလသေ၀ါကရဏ = အရှင်သခင်၊ လင်ယောက်ျားတို့၏ စိတ်တိုင်းကျအောင် ပြုစုလုပ်ကျွေး နည်းပရိယာယ်။
၁၆။ သုသုသံရက္ခဏဒါရဏကြိယာ = ကလေးသူငယ်တို့အား စောင့်ရှောက်မွေးမြူချော့မော့ထိန်းသိမ်းရေး။ ၁၇။ နာနာဒေသိယ ၀ဏ္ဏလေခန = ဘာသာမျိုးစုံကို ရေးနိုင်ဖတ်နိုင်ခြင်း။
၁၈။ တမ္ဗုလာရက္ခာဒိကြိယာ = ကွမ်းယာခြင်းအတတ်။
ကဲ...... အဲသည်အတတ်တို့ကို အကဲခတ်ကြည့်ကြစမ်းပါ၊ လွယ်လွယ်ကူကူ ပေါ့ပေါ့ဆဆ လျှပ်ပေါ်လော်လီ နေရုံမျှနဲ့ ဤပညာတွေကိုမရနိုင်ပါဘူး။ အပတ်တကုတ်ကြိုးစားအားထုတ်ပြီး သင်ကြပါရတယ်။ ပြည့်တန်ဆာ ဆိုတာ လမ်းမပေါ်က ကလေကချေမိန်းမလို့ ထင်ရင်မှားပါလိမ့်မယ်။ ရုပ်ရည်ချောမွေ့သလောက် ဉာဏ် ပညာအရည်အသွေးတောက်ပြောင်ရပါမယ်။ အမျိုးအနွယ်အားဖြင့်လည်း ဂုဏ်သရေရှိမင်းမျိုး၊ မှူးမတ်မျိုး ဖြစ်ရပါဦးမယ်။ ကျွန်မ၏ မိခင်ဖြစ်သည့် သာလ၀တီ ကိုပဲကြည့်ပါတော့။ ဝေသာလီ ပြည်မှာ 'ဂဏ' အမတ်ကြီးတစ်ဦးရဲ့သမီး အမ္ဗပါလီ ဆိုတဲ့ပြည့်တန်အမျိုးသမီးကြောင့် တိုင်းပြည်သာယာနေပါတယ်လို့ ကျွန်မတို့ ရာဇဂြိုလ်က ခရီး သွားကုန်သည်ကြီးတွေက လျှောက်ထားသတင်းပေးကြတဲ့အတွက် ဘုရင် ဗိမ္ဗိသာရမင်းကြီးက မှူးမတ်မျိုး ဖြစ်တဲ့ ကျွန်မ၏မိခင်ကို ပြည်ကြီးတန်ဆာအဖြစ် ခန့်ထားသတ်မှတ်လိုက်ခြင်းပါသည်။ ခရီးသွားကုန်သည် ကြီးတွေဟာ အမှန်မှာတော့ မိမိတိုင်းပြည်အတွက်ကုန်ကူးရင်း တိုင်းပြည်ရေးရာ သူလျှိုကြီးတွေလည်း ဖြစ်ပါသည်။ ကျွန်မ၏မိခင်မှာ ဘုရင်ဧကရာဇ်က သတ်မှတ်ခန့်ထားသာဖြစ်လို့ ဥယျာဉ်၊ ပန်းခြံ၊ရထားနှင့်တကွ အခစား အခြွေအရံမိန်းမပျိုကလေးများစွာအပြင် အစောင့်အရှောက်အရံအတားအလုပ်သမားအမှုထမ်းတို့နှင့် ပြည့်စုံ ခမ်းနားစွာနေရပါသည်။ သွားလာဝင်ထွက်ဆက်ဆံခွင့်ရသူများလည်း သေးသိမ်နုပ်မွဲတဲ့ ဆင်းရဲသားများမဟုတ်တဲ့ ဂုဏ်သရေရှိ သူဋ္ဌေးသူကြွယ်များက အနိမ့်ဆုံး အတန်းအစားများဖြစ်ပြီး၊ တိုင်းရေးပြည်မှု ကြည့်ရှုစီမံရတဲ့ မင်းညီမင်းသား၊ မှူးမတ်များ ပြည်တွင်းပြည်ပရန်ကို ခုခံချီတက်အောင်ပွဲရလာသည့် စစ်ရေးစစ်ရာစစ်ဗိုလ်ကြီးများ၊ တိုင်းတပါး မှလာကြသော ဧည့်သည်တော်ကြီးများ၊ ဒီလိုပုဂ္ဂိုလ်များကို ဧည့်ခံ အပန်းပြေစေရခြင်းဖြစ်ပါသည်။ လူအမျိုးမျိုး၊ စရိုက်အဖုံဖုံ ၀ါသနာစုံဖြစ်တဲ့ ပုဂ္ဂိုလ်အသီးသီးကို လိုက်လျောညီထွေ ကျင့်တတ်စေဖို့က ကျွန်မ ပြောခဲ့တဲ့ အတတ်ပညာ (၁၈)ရပ်ကို နှံ့စပ်လိမ္မာရပါသည်။ ကိလေသာကာမ ရသတဏှာ ကိစ္စတစ်ခုသာ မဟုတ်ပဲ မင်းမှုထမ်း၊ စစ်မှုထမ်းများကို နိုင်ငံတော်အတွက် ကြိုးပမ်းသည်ထက်ကြိုးပမ်းနိုင်ကြအောင် အားပေးသွေးထိုးရတာမျိုးများရှိသလို နိုင်ငံရပ်ခြား တိုင်းတစ်ပါးက ဧည့်သည်တော် သံတမန်ကြီးများထံမှ လျှိူ့ဝှက်သတင်းမျိုးစုံကိုလည်း အစ်အောက်မေးမြန်း စုံစမ်းတီးခေါက်ယူရပါသည်။ ဒါကြောင့် ဘာသာအမျိုးမျိုး ၊စာအမျိုးမျိုးကို ပြောနိုင်၊ ဆိုနိုင်၊ ဖတ်နိုင်၊ရေးနိုင်ရမည်ပေါ့။ တကယ်ဆိုတော့ ကျွန်မတို့မှာ နိုင်ငံဝန်ထမ်း ဌာနတစ်ခုလို့ ဆိုနိုင်ပါလိမ့်မယ်။ ကျွန်မ၏မိခင်မှာ တစ်ခါကဘုရင့်သားတော် အဘယ မင်းသားကိုစွဲ၍ ကိုယ်ဝန်ရခဲ့ပါသည်။ မွေးဖွားလာတဲ့ အခါ သားယောက်ျားလေးဖြစ်နေတော့ ကလေးရဲ့နောင်ရေးဂုဏ်သိမ်မမှေးရအောင် ဖခင် အဘယ မင်းသား ကိုယ်တိုင် မွေးစားဖို့ အစီအစဉ်လုပ်ရပါသည်။ အဘယ မင်းသားကလည်း သူ့ရင်သွေးဖြစ်ကြောင့်သိလေ တော့ 'ဇီဝက' ဟုအမည်ပေးပြီး ကောင်းမွန်စွာမွေးစားခဲ့ပါသည်။ ကျွန်မကိုမွေးဖွားတဲ့အခါမှာတော့ သမီးမိန်းကလေးဖြစ်တဲ့အတွက် သူ့အရိုက်အရာကိုဆက်ခံနိုင်အောင် ပညာစွယ်စုံသင်ကြားပေးခဲ့ပါသည်။ မိခင်ကြီးကွယ်လွန်ပြီးတဲ့နောက် ကျွန်မ၏အစ်ကိုကြီးက သမားတော်ကြီး ဇီဝက ဟုထင်ရှားကျော်ကြားနေသလို ကျွန်မမှာလည်း ရာဇဂြိုလ်ပြည်ကြီးမှာ ရုပ်ဆင်းသဏ္ဍာန်ကြန်အင် လက္ခဏာ ဗဟုသုတအဖြာဖြာနှင့် ထင်ရှားကျော်စောတဲ့ မင်းအသိအမှန်ပြု တိုင်းပြည်ဝန်ထမ်း ပြည်ကြီး တန်ဆာဖြစ်လာခဲ့ခြင်းပါ။ ဒါကြောင့် ပြည့်တန်ဆာဟူ၍ အောက်တန်းစား၊ ပညာမဲ့မဟုတ်ကြောင်းပြောချင်ပါသည်။ ကျွန်မမိခင်သာ လျှင်ကွယ်လွန်အနိစ္စရောက်သွားခဲ့သော်လည်း ကျွန်မမိခင်နှင့် ခေတ်ပြိုင်တန်းတူ အမ္ဗပါလီအမျိုးသမီးကြီး သည်ကားဆိုလျှင် ဝေသာလီပြည်က မှူးကြီး၊မတ်ကြီး၊ ပဏ္ဍိတ်ပညာရှိကြီးများထက် အရည်အချင်းသာလွန် လှတဲ့ ဗုဒ္ဓသမီးတော် ထေရီမယ်ကြီးဖြစ်နေရပြီလေ။ ဒါကိုထောက်ဆလို့ ကျွန်မတို့ကို အထင်မကြီးချင်လျှင် နေပါ၊ အထင်တော့မသေးပါနဲ့လို့။ ကြောင်းကျိုးသိမြင် လူ့သခင်တို့က နေ့စဉ်မပြတ်သင်ကြားသည်ရှိသော် တိရစ္ဆာန်မွေး တောမှကြက်တူရွေး ပင်ဖြစ်သော်လည်း လူတို့ဘာသာ ထွေလာထူးပြားလူ့စကားကို သာယာမြည်ကြွေးဆိုတတ်ပါသေးသည်။ မငြိမ်လှုပ်ချောက် တောထဲမှမျောက်တို့ပင်လျှင် လှပယဉ်ကျေး ...က..တတ်ပါသေးသည်။ ထို့အတူ ရှင်တော် ဗုဒ္ဓဟောဖော်ပြတဲ့ ဓမ္မအရသာများကို ခံစားနာကြားရတဲ့ တစ်နေ့ကျလျှင် ကျွန်မအဖို့အရာမှာအဘယ် ကြောင့် နှေး အမြင်မှေး၍ မယဉ်ကျေးပဲ ရှိနိုင်ပါ့မလဲရှင်။ တစ်နေ့သောနံနက်ခင်းအခါ ကျွန်မရဲ့ သီးသန့်သဉ္ဇာလီဆောင်အတွင်း ခင်းထားအပ်သော ခုတင်ပေါ်မှာ အသာအယာလှဲလျောင်း၍ နေပါသည်။ ကျွန်မရဲ့ အခြွေအရံမိန်းမပျိုတစ်ယောက်က ဒေါင်းမြီးယပ်နဲ့ခပ်ပေး နေ၍ တစ်ဦးကတော့ ကျွန်မ၏ လက်သည်းများကို စပယ်ဖူးကလေးများနဲ့တူအောင် ကိုက်ညှပ်ပေးနေစဉ် ၀ယ်..တစ်ဦးကတော့ ခြေရင်းကထိုင်၍ ခြေသည်းကလေးများကို ဒန်းဆိုးပေးနေပါသည်။ ကျွန်မရဲ့ခါးပေါ်မှာ ပါးလွှာတဲ့ ပိုးသားကလေးသာ လျော့ရိလျော့ရဲ တင်ထားပါသည်။ အဲသည့်ပိုးသားအောက် ကကျွန်မရဲ့ ဖြောင့်စင်းတဲ့ ပေါင်တံကို အမျိုးသမီးတစ်ဦးက မွှေးကြိုင်သော နံ့သာဆီနှင့် လိမ်းကျံနှိပ်နယ် ပေးနေပါသည်။မနီးမဝေးမှာ စောင်းအတီးသင်နေကြတဲ့ ကလေးမများကဖြင့် စောင်းချင်းများကို ထံတျာဖြည့် စွက်၍ လက်သံပြနေကြဆဲအခါဖြစ်ပါ၏။ ထိုအတောအတွင်းမှာ အိပ်ခန်းအပြင်ဝယ် တာဝန်ကျနေသော မိန်းမပျိုလေးက အိပ်ခန်းထဲ ကမန်းကတန်း ၀င်လာခဲ့ပြီး ကျွန်မရဲ့အိပ်ယာဘေးမှာ ပုဆစ်ဒူးတုပ်ထိုင်လိုက်ရင်း.... " မမ၊ ကျွန်မတို့ဥယျာဉ်တွင်းကို ရထားပေါင်းချုပ်တစ်စင်းဝင်လာပါတယ်" "ဟဲ့....ဒီအချိန်မှာ ဘယ်ကဧည့်သည်များလာနေတာလဲ၊ ငါ့ဆီကို ကြိုတင်အချိန်းအဆိုမရှိပဲနဲ့ ဘယ်သူတစ်ဦး တစ်ယောက်မှမလာရဘူးဆိုတာ ပြောလိုက်" သူငယ်မလေးက သွက်လက်ဖျတ်လတ်စွာ ထ,ထွက်သွားပါသည်။ သို့သော် မကြာမတင်ပြန်ဝင်လာပါသည်။ " မမ၊ ဧည့်သည်က အလွန်ကျက်သရေရှိတဲ့ အမျိုးသမီးတစ်ဦးပါ၊ သူ..အခုအဆောင်ဝ လှေကားမှာ ရထားက ဆင်းနေပါပြီ " " ဟေ.....အမျိုးသမီးတစ်ဦး " ကျွန်မကထူးဆန်းနေသောကြောင့် လဲလျောင်းနေရာမှ အသာအယာထလိုက်ရာ အနှိပ်သည်မလေးကဖေးမ ပြီး ထူပေးလိုက်ပါသည်။ " ဘာကိစ္စတဲ့လဲ၊ ဘယ်သူဆိုတာ သွားမေချေအုံး၊ ငါ အချိန်တွေအလကား မဖြုန်းနိုင်ဘူး " " ဟုတ်ကဲ့...မမ " ကျွန်မက အပေါ်ရုံအင်္ကျီခပ်ပွပွကို လှမ်းလင့်၍တောင်းလိုက်သည်၊ အရိပ်အကဲကိုသိတတ်ကြသော အခြွေအရံတို့က စံပယ်နဲ့သင်းထားသော ကောဋုမ္ဗရာဇ် ပိုးအပေါ်ရုံအင်္ကျီကို တစ်ယောက် တစ်ဖက်ကိုင်ကာ အဆင်သင့်ဝတ်ပေးကြသည်၊ သရဖီနံ့ထုံသောခေါင်းလျှော်ရည်ဖြင့် လျှော်ထားခါစ ကျွန်မ၏ဆံကေသာတို့ မှာပခုံးတစ်ဖက်တစ်ချက်က လျော့ကျကော့ကျ၍ ဒူးဖျားဝယ် ဖုံးအုပ်နေကြသည်၊ ကျွန်မရှေ့ဝယ်လာ၍ ထောင်ပြသော ကြေးမုံပြင်ဝယ် ကျွန်မ၏မျက်နှာသွင်ပြင်ကို တစ်ချက်ကြည့်လိုက်ပါသေးသည်။ " မမ၊ ဧည့်သည်အမျိုးသမီးက မမနဲ့သာတွေ့ပါရစေလို့တောင်းဆိုနေပါတယ်၊ ကိုယ်ရေးကိုယ်တာကိစ္စတစ်ခု ပါလာတယ်လို့လည်းပြောပါတယ်၊ ဘာပဲဖြစ်ဖြစ် အထက်တန်းကျကျသဘောသကာယကောင်းတာကိုတော့ ကျွန်မပြောဝံ့ပါတယ်၊ သူ့အမူအရာဟာ ခင်မင်နှစ်လိုဖွယ်ရှိပါတယ် " " အမယ်လေး၊ ငါ့ထက်များလှနေပလားကွယ်၊ ကဲ..ကဲ..မုဒရက်ဖျော်ရည်ကလေးများနဲ့ ဧည့်ခန်းမှာဧည့်ဝတ် ပြုထားလိုက်ကြ " မကြာမတင် အခန်းကြီးထဲကိုကျွန်မ၀င်သွားပါသည်။ စိန့်ပြည်မှလုပ်သော စန္ဒကူးညောင်စောင်းပေါ်တွင် ကျွန်မနှင့်အသက်အရွယ်မတိမ်းမယိမ်းရှိသောမိန်းမပျိုကိုမြင်လိုက်ပါသည်။ သူကမူကျွန်မကိုမမြင်သေး၊ အဖိုးထိုက်တန်သော ပရိဘောဂနှင့်မွမ်းမံခြယ်လှယ်ထားသော အဆင်အပြင်များကို စိတ်ဝင်စားနေပုံရ သည်။ ထို့ကြောင့်သာပင် ကျွန်မက ကျွန်မလောက်မလှသော်လည်း ကျက်သရေရှိသော သူ့မျက်နှာ၏ ထူးခြားချက်ကို ကောင်းစွာသတိပြုနိုင်လောက်အောင်အချိန်ရလိုက်ပါသည်။ ကျွန်မက လေးတွဲ့ယဉ်နွဲ့သော ခြေလှမ်းဖြင့် သူ့အပါးကိုလျှောက်သွားပြီးကာ... " ကျွန်မ သီရိမာပါ " ဟု နှုတ်ခွန်းဆက်လိုက်ပါသည်။ သူကကျွန်မကိုကြည့်၍ တစ်ခဏကလေးလောက်အံ့သြသွားပုံရပါသည်။ နောက်မှခင်မင်သောအပြုံးကို ဆောင်၍ မတ်တတ်ထလိုက်ပါသည်။ " ဒီလောက်လှတာဟာ သီရိမာပဲဖြစ်ရမှာပေါ့၊ ကျွန်မကတော့ ဥတ္တရာပါ " သူကသူ့ကိုယ့်သူ မိတ်ဆက်ရင်း လက်နှစ်ဘက်ကို ကမ်းလင့်ပါသည်။ သူကမ်းလင့်သော လက်နှစ်ဘက်ကို ကျွန်မက ကျေကျေနပ်နပ်ကြီးကိုင်၍ နှစ်ယောက်သား ယှဉ်ထိုင်မိကြပါသည်။ သူသည်အဆင့်အတန်းအနိမ့်အမြင့်ကို ပဓာနပြုပုံမရ၊ မိန်းမတို့မည်သည် ၀န်တိုခြင်း၊ မစ္ဆရိယပွားခြင်း၊ တစ် ဖက်လူအား နှိမ့်ချခြင်းမြင့်သာ မာန်မာနတက်ကြွကြပါသည်။ " ဥတ္တရာ လို့ကျွန်မကြားဖူးနေတာတော့ ကြာပါပကော " " ဟုတ်ကဲ့....သုမနသူဋ္ဌေးကြီးရဲ့ ချွေးမပါ " " သြော်...သြော်....နန္ဒသူဋ္ဌေးကလေးရဲ့ သက်ထားကြင်ယာပေါ့နော် " " ဟုတ်ပါတယ်..သီရိမာ၊ ကျွန်မယောက်ျားကိုများတွေ့ဖူးပါသလား " " အို..အို..သူ့ခမျာကို အထင်မမှားလိုက်ပါနဲ့၊ ကျွန်မအပါးကို သူမရောက်ဖူးပါဘူး" ဟုကျွန်မက ရယ်သွမ်းသွေး လိုက်သောအခါ ကျွန်မစကားကို သံသယကင်းစွာလက်ခံပါသည်။ " အင်း..သူသီရိမာနဲ့မတွေ့ဖူးတာ..ကျွန်မအတွက် နစ်နာတာပဲ" " ဘာကိုဆိုလိုတာလဲ ဥတ္တရာရဲ့" ဤအတွင်းကျွန်မရဲ့အခြွေအရံက မနောလင်ပန်းဝယ် ရွှေခွက်နှစ်ခွက်နှင့်ထည့်လာအပ်သော မုဒရက်ဖျော် ရည်များကို တရိုတသေပေးလာ၏။ ကျွန်မက ဥတ္တရာအား ရိုရိုသေသေ တစ်ခွက်လှမ်းပေးလိုက်ပြီး ကျွန်မက တစ်ခွက်ကိုင်ထားလိုက်သည်။ အခြွေအရံကလေးသည် မနောလင်ပန်းကို ရင်ဝယ်ပိုက်လျက် မတ်တပ်စုံရပ် ကာ အစေအပါးကို ခံယူလျက်ရှိသည်။ ဥတ္တရာသည် ထိုမိန်းကလေးအားပြုံးကြည့်လိုက်သည်။ ကျွန်မ သူ့ဆန္ဒကိုချက်ချင်းသိလိုက်ပါသည်။ " မင်းသွားနိုင်ပြီကွယ်၊ ငါလိုတော့မှခေါ်လိုက်တော့မယ်နော်" မိန်းမပျိုလေးက ရို့ရို့ကျို့ကျို့နောက်တဆုတ်ဆုတ်ဖြင့်အခန်းအတွင်းမှကွယ်ပျောက်သွားသည်။ " သီရိမာနဲ့သာ တွေ့ဖူးရင် ကျွန်မ လွတ်လွတ်လပ်လပ်ကြီး ဥပုသ်ပြုနိုင်မှာပေါ့၊ အခု ကျွန်မကို ကူညီပါလို့ တောင်းပန်ရအောင် လာခဲ့တာပဲ သီရိမာ" သူကကျွန်မအား အဖျော်ရည်ကို ဦးစားပြု၍သောက်ရန်ရွှေခွက်ကို မြှောက်ပြလိုက်သည်။ ကျွန်မကအိမ်ရှင် ပီပီသူ့ကိုပြန်၍ ဦးစားပေးလိုက်ရသည်၊ ထိုအချိန်မှ သူကနှုတ်ခမ်းပါးကလေးမျှသာ စွတ်အောင် ရွှေခွက်ကို ပင့်လိုက်သည်။ ယဉ်ကျေးမှုကို အတော်ရိုသေပါကလားဟု ကျွန်မမှတ်ချက်ချလိုက်မိပါတော့သည်။ " အစ်မကြီးစကားကြားရတာ ကျွန်မထူးဆန်းနေတယ်၊ ဂုဏ်သရေရှိတဲ့ဇနီးမယားမှန်သမျှ သူတို့လင်သားကို ကျွန်မဆီမသွားမလာကြအောင်ပဲ ထိန်းကွပ်ချုပ်ချယ်ထားလေ့ရှိပါတယ်၊ အစ်မကြီးကတော့အစ်မကြီးခင်ပွန်း နဲ့ကျွန်မကို တွေ့ပေးစေချင်တဲ့သဘောလား၊ သြော်...ခွင့်ပြုပါနော်၊ ကျွန်မရှင့်ကိုအစ်မကြီး ခေါ်ချင်လာတယ်" "ခေါ်ပါညီမငယ်၊ အစ်မကြီးဝမ်းသာပါတယ်၊ ညီမငယ်က အစ်မကြီးထက်တောင်လှပပျိုမြစ်နေတာပဲ၊ အစ်မကြီးဂုဏ်ယူပါတယ်၊ ဒါထက်ရိုင်းတယ်လို့မထင်ရင်မေးပါရစေ၊ ငါ့ညီမရဲ့အဖိုးစားနားက ဘယ်လောက် သတ်မှတ်ပါသလဲ " " သြော်..ဟော်..ဟော်.." ကျွန်မက ဂုဏ်ယူစွာမပွင့်တပွင့်လေးရယ်ပြလိုက်သည်။ " ဒီရာဇဂြိုလ်ပြည်မှာ ကျွန်မရဲ့အဖိုးစားနားကို မကြားဖူးတဲ့လူမရှိပါဘူး၊ တစ်နေ့ကို အသပြာတစ်ထောင်ဆို တာနန်းတွင်း၊နန်းပြင်သိနေကြပါတယ်၊ အင်းလေ....အစ်မကြီးကတော့ အမျိုးသမီးပေကိုး၊ ကာမစ္ဆန္ဒနီဝရဏ တွေကိုဂရုမစိုက်ကြောင်းလည်းညီမလေးရိပ်မိပါပြီ၊ ဧကန္တ အစ်မကြီးဟာ ဗုဒ္ဓရဲ့အဘိဓမ္မာကို သက်ဝင်ယုံ ကြည်နေတယ်မှတ်တယ် " " ဘယ့်နှယ်ပြောပါလိမ့်ညီမရယ်၊ ညီမကော....မယုံကြည်ဘူးလား " " အင်း..တစ်နေ့နေ့မှာ ယုံကြည်လာမလားတော့မသိဘူး " " ဟုတ်တာပေါ့..ညီမရဲ့၊ ပတ်ဝန်းကျင်နဲ့ ဗုဒ္ဓရဲ့အဘိဓမ္မာဟာဆက်စပ်မှုရတဲ့ တစ်နေ့ဖြစ်မှာပေါ့၊ ဝေသာလီက အမ္ဗပါလီအမျိုးသမီးဟာ ညီမတို့လိုပဲလေ၊ သူကတော့ ဘုရားသာသနာတော်ကိုတောင်ဝင်ပြီး ခိဏာသ၀ ရဟန္တာမကြီးဖြစ်သွားတယ်လို့ကြားပါကလား " " အင်း...သူ့အသက်ကကြီးလာလို့ထင်ပါရဲ့၊ ကျွန်မရဲ့မိခင်နဲ့မှ သူကတစ်ရွယ်ထဲကိုး၊ ဒါထားပါတော့၊ ကျွန်မ အစ်မကြီးအတွက် ဘယ်လိုဆောင်ရွက်ပေးရမလဲ၊ ပြောသာပြောပါ " ဥတ္တရာက ဘာမှမပြောခင် ကျွန်မကိုပြုံးကြည့်နေပါသေးသည်။ " ပြောရမှာတော့အားနာတယ်.သီရိမာ၊ ကျွန်မခင်ပွန်း နန္ဒသူဋ္ဌေးသားကလေးဟာ သူ့ဖခင် သုမနသူဋ္ဌေးကြီး လိုပဲ၊ ဗုဒ္ဓရဲ့အဆုံးအမကိုလက်မခံသေးဘူး၊ ကျွန်မကတော့ ကျွန်မရဲ့မိဘကဆင်းသက်ပြီး ရတနာသုံးပါးနဲ့ ဒါန၊သီလ၊ဘာဝနာကိုအားကိုးပြုပြီးနေတယ်၊ ဒါပေမယ့် သူနဲ့အကြောင်းပါတဲ့နေ့ကစပြီး အဋ္ဌင်္ဂဥပုသ်ကို စောင့်ထိန်းခွင့်မပေးပဲ သူ့ကိုသာ နေ့ရှိသမျှ လုပ်ကျွေးနေရတယ်လေ " ကျွန်မကသူ့စကားဆုံးတော့ ခစ်ခနဲ ရယ်လိုက်မိပါသည်။ " ကျွန်မအဖြစ်က ရယ်စရာကောင်းတယ်နော်..သီရိမာ " " မဟုတ်ဘူးအစ်မကြီး၊ ကျွန်မပြက်ရယ်ပြုတာမဟုတ်ပါဘူး၊ အစ်မကြီးရဲ့ခင်ပွန်းဟာ အစ်မကြီးကို ဘယ်လောက်ချစ်တယ်ဆိုတာ ရိပ်မိနိုင်လို့ရယ်မိတာပါ " " ဒါ...ချစ်တယ်လို့ခေါ်သလား..သီရိမာ၊ အိုတဲ့..နာတဲ့..သေတဲ့..အထိသူချစ်နိုင်မှာမဟုတ်ပါဘူး၊ အဆင်းလှ တုန်း၊ အရွယ်နုပျိုတုန်းကျန်းမာသန်စွမ်းတုန်းသာချစ်စရာလို့သဘောထားနိုင်တာပါ၊ တကယ်ဆိုတော့ သူ့ ကိုယ်တောင် သူမသိသေးပါဘူး " အင်း..ဒါစဉ်းစားစရာပဲ၊ ကျွန်မအမေအရွယ်လွန်သွားတဲ့အချိန်မှာ ဘယ်သူမှအရေးမစိုက်ကြတော့ဘူး၊ ပျိုနု စဉ်မှာလူတိုင်းအနမ်းခံရတဲ့ ပန်းကလေးလိုဘ၀က အိုလာတော့ အမှိုက်သရိုက်လိုသဘောထားလာကြတယ်၊ ကျွန်မရဲ့ဒီအလှအပနဲ့နုနယ်ပျိုမြစ်ခြင်းဟာလည်း ဘယ်လောက်များကြာကြာခံပါ့မလဲ၊ နောက်ငါးနှစ်၊နောက် ဆယ်နှစ့်........................ ကျွန်မက အထိတ်တလန့်နှင့်ရှေ့ရေးကို တွေးနေမိသောကြောင့်စကားစပြတ်နေကြသည်။ " ဘာတွေများတွေးနေသလဲ..သီရိမာ၊ လှလွန်းတဲ့မိန်းကလေးကို ဇရာအကြောင်းပြောမိတာ စိတ်အနှောင့် အယှက်ပေးရာများ ကျသွားပလား " " အင်း..ကျွန်မစဉ်းစားမိတယ်ဆိုပါတော့၊ ဒါပေမယ့် အခုလှနေတာကလေးကိုတော့ ကျွန်မကျေနပ်နေသေး တယ်လေ" ပြည့်ဖြိုးသော ကျွန်မ၏လက်မောင်းကလေးကို သုံးသပ်ရင်းပြောလိုက်မိသည်။ ဟုတ်ပါသည်။ ကျွန်မလက်မောင်းကလေးဟာ အသားအရေက ရွှေလိုဝင်းပနေပါသည်။ အရိုးအဆစ်မပေါ်ပဲ သွယ်သွယ်ပျောင်းပျောင်းရွှေငှက်ပျောပင်ကထွက်လာတဲ့ အစို့ကလေးလိုနူးညံ့သန့်စင်နေပါသည်၊ ရွှေရောင် ပြေးနေတဲ့ အမွေးနုကလေးများက ခပ်ရေးရေးကလေးရှိပါသည်။ ဥတ္တရာသည် ကျွန်မရုပ်ပသာဒကို ကျွန်မတပ်မက်နေကြောင်းသိ၍ ကရုဏာသက်သောအပြုံးဖြင့်ခေါင်း တဆတ်ဆတ်ညိတ်နေပါသည်။ ကျွန်မသူ့အရိပ်အကဲကိုသိ၍ ချစ်စနိုးစွာ စကားဆက်လိုက်ရသည်။ " ကဲလေ...ကျွန်မဘယ်လိုကူညီရမလဲ " " ဆယ့်ငါးရက်တိတိ ကျွန်မအိမ်မှာလာနေပြီး ကျွန်မကိုယ်စားကျွန်မရဲ့ခင်ပွန်းကို ပြုစုလုပ်ကျွေးပေးပါ သီရိမာ၊ ကျွန်မ ဗုဒ္ဓကိုအိမ်မှာဆွမ်းပင့်ကျွေးချင်တယ်၊ အဋ္ဌင်္ဂသီလ ဆောက်တည်ချင်တယ်၊ တရားနာချင် တယ်၊ သီရိမာအတွက် ကျသင့်တဲ့ငွေ တစ်သောင်းငါးထောင်ကို အခုပေးသွင်းခဲ့ပါမယ် " " နေပါဦးလေအစ်မကြီး၊ ဆယ့်ငါးရက်တောင်များလှချည့်၊ နောက်ပြီးတော့ အစ်မကြီးရဲ့ခင်ပွန်းကကျွန်မကို နှစ်သက်လိမ့်မယ်လို့အစ်မကြီးပြောရဲလို့လား" ဟု မချိုမချဉ်နှင့်တမင်သွေးတိုးစမ်းကြည့်လိုက်သည်။ " အမယ်လေးလေ၊ ငါ့ညီမလောက်လှတာ ရာဇဂြိုလ်မှာ အရှားသားကလားကွယ်၊ ဒါကိုလက်မခံဘူးဆိုရင် ကာယဂတာသတိအမြဲရှိနေတဲ့ ယောဂီသာဖြစ်တော့မပေါ့၊ အစ်မကြီးခင်ပွန်းအကြောင်းအစ်မကြီးသိပါတယ်" ဥတ္တရာကပြုံးရုံသာပြုံးလိုက်စေကာမူ ကျွန်မကညိုးညိုးညံညံကလေးဖြစ်အောင်ရယ်၍ သူ့ရှေ့ဝယ်မတ်တပ် ထလိုက်ပါသည်။ ကျေနပ်စွာလှုပ်ရှား၍ခါးကလေးပေါ်သို့လက်နှစ်ဘက်တင်ကာတစ်လှမ်းနှစ်လှမ်း လျှောက် လိုက်ပါသည်။ မေးမည့်သာမေးလိုက်သည်၊ ကျွန်မရဲ့ရူပါရုံကွန်ချက်က ပြေးထွက်နိုင်သောသူအလွန်ရှား သဖြင့်သူ့ယောကျာ်းလည်း ဘာသားနှင့်ထုသနည်းဟု သိပြီးဖြစ်ပါသည်။ ဥတ္တရာက လက်ခုပ်သုံးချက်တီးလိုက်သည်၊ ဧည့်ခန်းကြီးအပြင်ဝယ်စောင့်နေရစ်ခဲ့ရသောသူ့အခြွေအရံက ငွေထုပ်ပိုက်ပြီး ၀င်လာပါသည်။ " ဟောဒီမှာငွေတစ်သောင်းငါးထောင်ပါ သီရိမာ၊ အစ်မကြီးရဲ့ကုသိုလ်ကမ္မပထကို ကူညီတဲ့အတွက်ညီမမှာ လည်းကောင်းမှုရဲ့အထောက်အပံ့ဖြစ်ပါလိမ့်မယ် " " အင်း....ကျွန်မကတော့ ဇနီးသည်တစ်ယောက်က သူ့ခင်ပွန်းအတွက် ကိုယ်တိုင်လာခေါ်ရတယ်ဆိုတာပဲ ဂုဏ်ယူချင်ပါတယ်၊ ဒါပေမယ့် ကျွန်မဘ၀ဟာ ပုဂ္ဂလိကပစ္စည်းမဟုတ်တာတော့အစ်မကြီးသိကောင်းပါရဲ့၊ ဆယ့်ငါးရက်တော့ ကျွန်မအချိန်ပေးနိုင်ပါ့မလားမသိဘူး " " ကောင်းပါပြီ၊ ကောင်းပါပြီ၊ ငါ့ညီမဆန္ဒရှိရာပြည့်စုံပါစေတော့၊ မနက်ဖြန်မနက်ရထားလွှတ်လိုက်ပါ့မယ် " " အို....ကိစ္စမရှိပါဘူး၊ ကျွန်မရထားနဲ့ပဲလာခဲ့ပါ့မယ် " ဥတ္တရာက ကျွန်မလက်နှစ်ဘက်ကိုလှမ်းကိုင်လိုက်ပြန်ပါသည်။ ကျွန်မကသူ့ကိုတွဲဖက်ရင်း ရထားပေါင်းချုပ် ပေါ်အရောက်လိုက်ပို့ပါသည်၊ သူ့ရထားဥယျာဉ်မှထွက်သည်အထိပြုံးကြည့်နေမိသည်။
************************************************************************** ကျွန်မ၏မြင်းဖြူလေးကောင်'က'သောရထားက နန္ဒသူဋ္ဌေး၏တိုက်ဝသို့ဆိုက်လိုက်ပါသည်။ ရထားနောက်မြီး တွင်ရပ်ပါလာကြသော အမှုထမ်းနှစ်ယောက်က လျင်မြန်သွက်လက်စွာဆင်း၍တံခါးဖွင့်ပေးလိုက်သည့် အချိန်ဝယ် ဥတ္တရာသည်ရထားပေါ်က ကျွန်မအားသူ့လက်နှစ်ဖက်ကမ်း၍ လှမ်းကြိုလိုက်ပါသည်။ " ကျေးဇူးတင်လှပါတယ် အစ်မကြီး " ကျွန်မက သူ့ယုယမှုကို အသိအမှတ်ပြုကာ ရထားပေါ်မှဆင်းလိုက်ပါသည်၊ အဆင်သင့်ရှိနေသော သူ့ခြွေရံ သင်းပင်းများက ကျွန်မ၏တံတင်းသေတ္တာများကို ကျင်လည်စွာသယ်ယူသွားကြပါသည်၊ အလှအပအသုံး အဆောင်အ၀တ်တန်ဆာများပင်ဖြစ်ပါသည်။ ကြီးမားကျယ်ဝန်းသောခန်းမကြီးသို့ရောက်လျှင် အိမ်မှုလုပ်သား ယောက်ျား၊မိန်းမအကုန်ကျွန်မကိုကြည့်၍ အထူးအဆန်းသဖွယ်အံ့သြနေကြပါသည်၊ တိုးတိုးတိတ်တိတ်ချောင်းမြောင်းကြည့်သူများလည်းအများအပြား၊ ဒီကြားထဲ " နာမည်ကြီးသလောက်လည်း လှသကိုး" ဟုယောက်ျားတစ်ယောက်၏အသံကကျွန်မကိုဝေဖန် နေသဖြင့် နန္ဒသူဋ္ဌေးဖြစ်လေမလားဟု ခေါင်းငဲ့၍ကြည့်လိုက်မိသည်၊ အတော်သားနားသော ဝေဖန်သည့် ယောက်ျားကား သူ့စကားသူရှက်စနိုး၍ အခန်းအတွင်းမှခပ်လျှိုးလျှိုးထွက်သွားသည်ကို မိန်းကလေးများက ကျိတ်ပြီးရယ်လိုက်ကြပါသည်။ " သူဋ္ဌေးမင်းအပေါ်ဆောင်မှာရှိပါလိမ့်မယ်၊ သွားကြရအောင်နော် " ကျွန်မကစကားမပြန်ပဲ ခေါင်းကိုဆတ်ခနဲ ညိတ်ပြလိုက်ပါသည်။ ပွတ်လုံးများဖြင့်ကြီးမားကျယ်ဝန်းသောလှေကားကိုနှစ်ယောက်သားတက်လာခဲ့ကြသည်။ လှေကားထိပ် အပေါ်ဆောင်တွင်အဆင်သင့်ရှိနေကြသော မိန်းမပျိုနှစ်ယောက်က ကျွန်မတို့အား အရိုအသေပေးလိုက် သည်။ " ညည်းတို့အရှင် အခန်းတွင်းမှာပဲလား " " ဟုတ်ပါတယ် သခင်မ၊ ဧည့်သည်အတွက်လည်း ဤအခန်းနဲ့ကပ်လျက်အဆောင်မှာ ပြုပြင်ထားပါပြီ " " အေး..အေး..မင်းတို့လွတ်လပ်စွာနေကြတော့ " ခန်းဆောင်ကြီးတစ်ခုကို ဖြတ်သန်းသွားပြီးနောက် ကတ္တီပါသပြေနုရောင်စည်းထားသည့် အတွင်းခန်းသို့ ဥတ္တရာကရှေ့ဆောင်ပြုပြီးဝင်သည်။ကျွန်မကသူ့နောက်ပါးမကျတကျကလိုက်သွားသည်။ ကျွန်မထက်ငါးနှစ်လောက်သာကြီးမည်ဟုခန့်မှန်းရသော သူဋ္ဌေးလေးကိုသလွန်ညောင်စောင်းတစ်ခုပေါ် တွင်တွေ့လိုက်ရပါသည်။ သူသည်သေအရက်ကိုရွှေခွက်နှင့်သောက်နေဆဲဖြစ်သည်၊ ကြန်အင်လက္ခဏာမှာ ခံ့ညားမွန်ရည်၍အပူအပင်အကြောင့်အကြစိတ်သောကကို သူ့အဇ္ဈတ္တအတွင်းသို့အရောက်မခံသည့်လူစား မျိုးဖြစ်ဟန်ရှိသည်။ ဥပဓိရုပ်ကောင်းသလောက် ကာမသုခလ္လိကာနုယောဂ ကျင့်သုံးပုံကိုအကဲခတ်နိုင်သည်။ မည်သို့ပင်ဖြစ်စေ သဘောထားဖြေင့်စင်းလျက် နှစ်လိုဖွယ်သောအဆင်းရှိသူတစ်ဦးဖြစ်ကြောင်းကိုကား ကျွန်မသိလိုက်ပါပြီ။ " ဟောဒီမှာ..သီရိမာ ရောက်လာပါပြီ အရှင့်သား " သူက ကျွန်မကိုစောင်းငဲ့၍ကြည့်လိုက်သည်။ ကျွန်မကလည်းသူ့ကိုသာ တည်တည်ကြည်ကြည်စူးစူးစိုက် စိုက်ကြည့်နေလိုက်သည်၊ သူ့စက္ခုဝိညာဉ်နှင့်ကျွန်မရူပါရုံသည် သံလိုက်နှင့်အပ်သဖွယ်ဖြစ်နေပါပြီ။ " ကဲ - သီရိမာ၊ ကိုယ့်အိမ်ကိုယ့်ယာလို သဘောထားပြီးပျော်ပျော်ပါးပါးနေပါနော်၊ အိမ်စေအမှုလုပ်များက လည်း 'ကျွန်' မနဲ့မခြား ခ,စားရိုသေကြပါလိမ့်မယ် " ဥတ္တရာ၏စကားကိုကျွန်မက လက်ခံလိုက်သည့်သဘောနှင့် ခေါင်းညိတ်လိုက်သည့်အချိန်တွင် နန္ဒကတော့ ကျွန်မ၏တစ်ကိုယ်လုံးကို ခြေဆုံးခေါင်းဆုံးကြည့်နေဆဲပင်ဖြစ်သည်။ သူအကြည့်ရဲသလောက်ကျွန်မက လည်းပသာဒကိုစွန့်ကြဲနေပါသည်။ သူဋ္ဌေးကတော်သည်သူ့ခင်ပွန်း၏အကဲခတ်ပုံကိုခပ်ပြုံးပြုံးနှင့် လျစ်လျူ ပြုလိုက်သည်။ မဆွကပင်အစစအရာရာ လင်နှင့်မယား သဘောတူစီစဉ်ထားသည့်အလား နောက်ထပ် ထူးထူးထွေထွေမပြောတော့ပဲ ဥတ္တရာက ကျွန်မကိုယဉ်ကျေးစွာနှုတ်ဆက်၍ ထွက်သွားပြီးသည့်နောက် ကတ္တီပါခန်းဆီးကာထားသည့်အပြင်ဘက်တံခါးမကြီးပိတ်လိုက်သံကြားရပါသည်။ မတုန်မလှုပ်ဖြစ်နေသေးသူနှင့်ကျွန်မနှစ်ဦးတည်းသာလွတ်လပ်စွာကျန်ရစ်ခဲ့မှန်းသိသဖြင့် သူရှိရာသို့ ရဲရဲ ၀ံ့ဝံ့တစ်လှမ်းနှစ်လှမ်းတိုးသွားပြီး သူ့ရှေ့တည့်တည့်မတ်မတ်မှာရပ်လိုက်သည်။ " သီရိမာကိုမနှစ်လိုရင် အနှောင့်အယှက်မပေးချင်ပါဘူး မောင်မောင် " ကျွန်မစကားက ငိုက်မြည်းနေသူကို ထိပ်ပုတ်၍ အနှိုးခံရသကဲ့သို့ရှိပါသည်။ " အို - အို..ဒီလိုမဟုတ်ပါဘူး" " ဧည့်သည်တစ်ယောက်ကိုပျူပျူငှာငှာမရှိပုံက ဧည့်ခံတာမဟုတ်ပဲ ပြန်နှင်နေတာနဲ့မတူဘူးလား၊ ဒါမှ မဟုတ်လည်း အာသဝေါကုန်ခမ်းတဲ့ ရဟန္တာကြီးများ ကျွန်မဖူးတွေ့နေရပြီလားလို့ " " ဗြုန်းခနဲ ဆိုတော့ အံ့သြသွားမိလို့ပါ..သီရိမာ " " အံ့သြတယ်...ဘာဖြစ်လို့...အံ့သြရတာလဲ " " သြော်..အိပ်မက်များ..မက်နေတာလားလို့ " " ထမင်းလုံးတစ္ဆေအခြောက်ခံနေရတယ်လို့များ မက်နေတာလားဟင် " " ကိုယ့်အလှကိုယ်သိရက်သားနဲ့တော့..တစ်ဖက်လူကိုငေါ့ဖို့မကောင်းပါဘူးကွယ် " ကျွန်မကတမင်အသံသာသာကလေးဖြစ်အောင် ရယ်လိုက်ပါသည်၊ သူကတော့မရယ်နိုင်၊မပြုံးနိုင် မျက် တောင်မခတ် ရွှန်းရွှန်းစားစားကြည့်နေဆဲပင်ရှိပါသေးသည်။ ဒါကိုပင်ကျွန်မက ကျေနပ်နေရသည်။ " လှံသွားဖြင့်အသားကိုထိုးသော် တရားစွဲနိုင်၏၊ မျက်စိဖြင့်အသဲအတွင်းသို့ ထိုးနစ်သော် တရားမစွဲနိုင်၊ သို့ သော်ဒဏ်ရာက တူမျှချေ၏ လို့နီတိဆရာက ဆိုပါတယ်မောင်မောင် " ထိုအခါမှ သူကပထမဆုံးပြုံးခြင်းဖြင့် ပြုံးပြလိုက်ကာပြန်၍ချေပလိုက်သည်။ " မေတ္တာသည် အသဲသို့စူးဝင်သောမြှားဆိပ်ကိုပင်ပြေစေပါသည် သီရိမာ၊ ဤနေရာတွင်ထိုင်စမ်းပါအုံး" ဟုသူ့အနားက ကတ္တီပါနေရာခင်းကို လက်နှင့်သပ်၍ဖိတ်ခေါ်လိုက်သည်။ သို့သော်ကျွန်မက ဗြုန်းခနဲမထိုင် သေးပါ၊ သူကိုယ်တိုင်ကိုယ်ထိလက်ရောက်ခေါ်ငင်ခြင်းကိုဂုဏ်ယူလိုက်ချင်ပါသေးသည်။ ထို့ထက်ပြောရ လျှင်ကျွန်မ၏ အလှအပအောက်ဝယ် ဒူးထောက်၍အညံ့ခံစေချင်သေးသည်။ ငွေကြေးနှင့်ဝယ်ယူရသည်ဟု သူစွဲမှတ်ထားတာမျိုးကိုကား သူ့ပိုင်နက်မို့ ကျွန်မကလုံးဝလက်မခံလိုပါ။ " အချို့သောသက်ညှာသည့်ယောကျာ်းများဟာ မိန်းမသားရဲ့အင်္ကျီဝတ်ရုံကို ကူညီပြီးသိမ်းဆည်းပေးတတ် တယ်ဆိုပါကလား....မောင်မောင်ရယ်.." ကျွန်မ၏အပေါ်ယံဖဲဝတ်ရုံကို ချွတ်လိုက်တော့မည်ဟန်ပြုဆဲတွင် သူကထိုင်နေရာမှထ၍ လောက၀တ်ပြုပါ သည်။ကျွန်မက သူအင်္ကျီချွတ်ယူနိုင်အောင် သူ့ကိုကျောပေး၍ အဆင်သင့်အနေအထားတွင်ရပ်လိုက်ပါ သည်။ ပုခုံးနှစ်ဖက်ကိုကိုင်ကာ ကျွန်မ၏၀တ်ရုံကို ချွတ်ခွာလိုက်သောအခါကား သူ့နှာတံမှ ပူနွေးသော အဿာယ ထွက်လေသည်..ဆံနု၊ဆံယဉ်ကလေးများဝဲနေသည့် ကျွန်မ၏လည်ကုပ်ကို တိုးဝှေ့သွားသည်။ ၀င်သက်အနေနှင့်ကား ကျွန်မကုပ်ပေါ်က ကတိုးနံ့ကို သူသယ်ယူသွားပြီးဖြစ်ပါသည်။ အပေါ်ယံဝတ်ရုံမှ ကင်းကွာသွားပြီဖြစ်သော ကျွန်မ၏ခန္ဓာကိုယ်အထက်ပိုင်းမှာ သိပ်သည်းသောကိုယ်ကြပ် အင်္ကျီလက်တိုကလေးအောက်၌ တစ်တစ်ရစ်ရစ်ဖြစ်နေပါသည်။ အဝေ့အ၀ိုက် အရှိုက်အဖိုတို့သည် လည်ဟိုက်အင်္ကျီအကြားမှ ၀င့်ဝင့်ကြွားကြွားပြနေကြသည်။ အင်္ကျီနှင့်ပိုးသားထဘီ မှီအောင်ဖုံးမထားနိုင်သည့်ကျွန်မ၏ ခါးသား မူကား..ရွှေခါးပတ်အထက်က သူ့လက် ထွာဆိုင်အတွင်းမှာ ၀င်းဝင်းဝါ၀ါရှိနေပါသည်။ ပိုးသားထဘီအောက်တွင်မူ ဆင်နှာမောင်းကဲ့သို့ ဖြောင့်စင်း ရှူးသွယ်သွားကြသည့် ပေါင်တံများကို အထင်းသားလောက်မြင်နေနိုင်သည်။ ကျွန်မ၏အငွေ့၊ ကျွန်မ၏အနံ့၊ ကျွန်မ၏အလှသည် သူ၏ရုပ်ရောနာမ်ကိုပါ မလှုပ်နိုင်အောင်ဆုပ်ကိုင်၍ ဖမ်းလိုက်သည့် ကွန်ယက်တစ်ခုဖြစ်သွားပါတော့သည်။ ဒါဟာကျွန်မအလုပ်ပဲမဟုတ်ပါလား။ " လှလိုက်တာ..သီရိမာ၊ လှလိုက်တာ၊ ဒီနေ့ဒီရက်အထိ သီရိမာကိုမတွေ့ခဲ့ရတာတော့ ကိုယ့်ကိုကိုယ်တောင် ခွင့်လွှတ်နိုင်ကောင်းစရာ မရှိပါဘူး " ကျွန်မ၏တစ်ကိုယ်လုံးကို သိမ်းကျုံး၍ဖက်ပြီး ညည်းညည်းညူညူအငမ်းမရဖြစ်လာပါပြီ။ " လောမကြီးပါနဲ့..မောင်မောင်..၊ တစ်ဆယ့်ငါးရက်သော ကာလပတ်လုံးခြေရင်းမှာ လုပ်ကျွေးဖို့ ငွေပေး ထားတာပြေးသွားမှာ မဟုတ်ပါဘူး " သူ့လက်နှစ်ဖက်ကိုဖြည်၍ ကျွန်မက သလွန်ညောင်စောင်းမှာ ခပ်စောင်းစောင်းလေးထိုင်လိုက်ပါသည်။ သူကရွှေကရားမှ သေအရက်ကိုငှဲ့ပေးရင်း...... " သီရိမာကိုစတွေ့တဲ့ မင်္ဂလာအထိမ်းအမှတ်အဖြစ် သောက်လိုက်ကြစို့လား " ကျွန်မကအလိုက်သင့်ယူလိုက်ပါသည်။ သူ့ရွှေခွက်နှင့်တစ်ချက်ထိလိုက်သည်။ သူနှစ်နှစ်ခြိုက်ခြိုက်မော့ သောက်လိုက်သည်ကိုကြည့်ပြီး ကျွန်မက နှုတ်ခမ်းကိုဆွတ်လိုက်ရပါသည်။ " မောင်မောင်...သေအရက်ကိုနှစ်သက်သလားဟင် " " ဘာဖြစ်လို့မေးတာလဲ သီရိမာ၊ သေအရက်ဆိုတာ နှုတ်မြိန်တယ်၊ ၀မ်းမီးကောင်းတယ်၊ ကိုယ်စိတ်ပေါ့ပါး တယ်လေ၊ အင်အားဗလသန်မာတယ်မဟုတ်လား " ကျွန်မက လက်ထဲကရွှေခွက်ကို လှည့်ပတ်ကြည့်ပြီးမှ ရွှေလင်ပန်းထဲ့သို့အသာကလေးအနုပညာဆန်ဆန် ချထားလိုက်ပါသည်။ နောက်ဆုံးတော့ သူ့မျက်နှာကိုခပ်ပြုံးပြုံး ခပ်ထေ့ထေ့ မျက်လွှာကိုပင့်ကြည့်လိုက်ပါ သည်။ ထိုအကြည့်မျိုးကို မည်သည့်ယောက်ျားမှ ခံနိုင်စွမ်းမရှိ။ " ဘာပြောချင်လို့လဲ သီရိမာ၊ ဘယ်လိုဝေဖန်မှာတုန်း၊ သေအရက်ကိုမုန်းသလား " " မင်းယောက်ျားများအဖို့ ' သူရာဓုတ္တ၊ ဣတ္တိဓုတ္တ ' ရယ်လို့ရှိကြတယ်မလား၊ မိန်းမကိုချစ်တဲ့လူဟာ အရက်ကို မချစ်ရဘူး၊ အရက်ကိုချစ်တဲ့လူဟာလည်း မိန်းမကိုချစ်ရာမရောက်ဘူး " " ဒါဖြင့်အရက်ကိုသောက်ပြီး မိန်းမကိုချစ်တယ်ဆိုရင်ကော " " လူတစ်ယောက်ဟာ ပခုံးတစ်ဖက်ထဲနဲ့ရေအိုးနှစ်လုံးမရွက်နိုင်ဘူးလေ " " ပုခုံးနှစ်ဖက်မှာ ရေအိုးတစ်လုံးစီထားရင်ကော" " ဒီရေအိုးတွေကို လက်ဘယ့်နှယ်ထားပြီး ကိုင်ပါ့မလဲ " " ဟဲ..ဟဲ..ဟဲ..သီရိမာ.....နှုတ်မှုရေးရာလင်္ကာတယ်ဆန်ပါလားကွယ်၊ တချို့ပညာရှိများကတော့ အရက်ကို တစ်ကျိုက်၊ မိန်းကလေးကို တစ်နမ်း၊ ကဗျာသီချင်းတစ်ပုဒ်၊ ဒါကိုပဲ ကာမစည်းစိမ်ဟူ၍ သမုတ်ပါကလား" " ပညာရှိပြောတာမှန်ပါတယ်၊ အရက်ကိုတစ်ငုံတစ်ကျိုက်ကမပိုရင်လေ၊ အဲသည့်နှုန်းနဲ့ဆိုရင် မိန်းကလေး ကိုလည်း တစ်နမ်းလောက်နဲ့ပဲ အာသာဖြေပေါ့၊ ကဗျာသီချင်းကိုလည်း တစ်ပုဒ်ပဲနားထောင်ရမယ်နော် " " သြော်...သြော်..မင်းပြောတာကိုသဘောပေါက်ပါပြီ..သီရိမာ၊ မင်းဟာတကယ်ဆိုတော့ နယူပဒေသ ကထိက ကလေးပါလား " သူက ဟက်ဟက်ပက်ပက်ပျော်ပျော်ရွှင်ရွှင်ရယ်မောနေပါသည်၊ သို့သော် သူ၏ရယ်မောခြင်းသည် ပေါ့ပေါ့ ဆဆ ပြက်ရယ်ပြုခြင်းမဟုတ်ပဲ ကျွန်မအား တကယ်လေးစားလာကြောင်းသိသာနေပါသည်။ ထို့ကြောင့် ကျွန်မဟာလေးလေးနက်နက်စကားကိုဆက်ရပါတော့သည်။ " ဧကဂ္ဂတာဆိုတာ တစ်ခုတည်းသောအာရုံကို အာရုံပြုတဲ့သဘောခေါ်ပါတယ်၊ ဘယ်သတ္တ၀ါဖြစ်စေ၊ တစ်ပြိုင်တည်း စိတ်နှစ်မျိုးမထားနိုင်ကြပါဘူး " " ဟုတ်ပါပြီ...ဟုတ်ပါပြီ၊ ကျုပ်သဘောပေါက်ပါပြီ၊ ဒါပေမယ့် အရက်ဟာ ကာမဂုဏ်အရာမှာ ရသာယန ဆေးစွမ်းကောင်းတစ်လက်ဆိုတာကရော " " အာဂန္တုက ခဏလာလည်တဲ့ ဧည့်သည်ကို တစ်သက်လုံးအားကိုးရမှာလား..မောင်မောင်၊ သေအရက်ထဲ မှာခဏလေးသာ သွေးသားတွေဆူပွက်ပြီ ရမ္မက်ဆိုတာကို နှိုးဆွနိုင်တဲ့ သတ္တိမျိုးပါဝင်ပါတယ်၊ အင်မတန် ချစ်ခင်နှစ်သက်တဲ့ ဧည့်သည်တစ်ယောက်နေရင်းကိုပြန်သွားတော့ ဧည့်သည်မရောက်ခင်ကထက် ပျင်းရိ ခြောက်သွေ့လာတယ်လို့မထင်မှတ်ခဲ့ဖူးဘူးလား၊ ဒီသဘောတရားပါပဲ၊ အာဂန္တုကသတ္တိသြဇာကုန်သွားရင် မသောက်ခင်ကထက် နွမ်းလျမိန်းမောနေတတ်ပါတယ် " " အမယ်လေး....ဓာတုရသ ဘေသဇ္ဇဆရာမလေးရယ် " အားရပါးရချီးကျူးရင်း ကျွန်မ၏တစ်ကိုယ်လုံးကို သိမ်းကျုံးပွေ့ဖက်ယူလိုက်ပါသည်။ " မောင်မောင်နေအုံးလေ၊ သီရိမာ..ဟာသမားတော်ဇီဝကရဲ့နှမဆိုတာမမေ့နဲ့အုံး " " အမယ်လေး..ထူးဆန်းလှချည့်လား..သီရိမာ၊ ဘယ်ပုံတော်စပ်ကြတာလဲ " " ရာဇဂြိုလ်ပြည့်ရှင် ဗိမ္ဗိသာရမင်းကြီးက ခန့်အပ်ထားတဲ့ပြည့်တန်ဆာအမျိုးသမီး သာလ၀တီဟာ သီရိမာရဲ့ မွေးသမိခင်ပါ..မောင်မောင်...၊ သီရိမာကို မဖွားခင်က မယ်တော်နဲ့ဘုရင့်သားတော် အဘယ မင်းသားတို့ ယဉ်ပါးတော်မူကြတဲ့အတွက် ဇီဝကကိုဖွားမြင်ခဲ့ရပါတယ်၊ တကယ်ဆိုတော့ ဇီဝကနဲ့သီရိမာဟာ မအေတူ ဖအေကွဲမောင်နှမလို့ဆိုရမှာပေါ့ " " ကဲ..ကဲ..ဒီလိုဖြင့် ပုရိသယောက်ျား မောင်တို့လိုလောကီသားတွေအတွက် ဆေးကောင်းတစ်လက် ဖော်စပ် ပေးနိုင်ပါ့မလား...သီရိမာ " ကျွန်မက ခပ်လှောင်လှောင်ရယ်သွမ်းသွေးပြီး သူ့မေးစေ့ကိုလက်ညှိုးဖြင့်ပင့်တင်၍ မချိုမချဉ်ကြည့်လိုက် ပါသည်။ " ဒီစိတ်တွေကြောင့် မယားအလှ ဥတ္တရာဟာ အဋ္ဌင်္ဂသီလမဆောက်တည်နိုင်ရှာတာထင်ပါရဲ့နော် " ကျွန်မစကားက သူ့အရှိုက်ကြားကို ကလိ၍ကစားသလိုဖြစ်သွားပါသည်။ " ဟုတ်တယ်လေ၊ ဒါဘာဖြစ်လဲ....၊ မောင်တို့ဖခင်လက်ထက်ကတည်းက ကိုးကွယ်လာတဲ့ နိဂဏ္ဍဆရာကြီး တွေက အရွယ်ကောင်းတုန်း ကာမဂုဏ်ကိုသုံးဆောင်ခံစားပြီး လူအိုလို့ကာမကုန်ခမ်းတဲ့အခါ ရဟန္တာဖြစ်နိုင် တယ်လို့ဆိုထားတာပဲ " " ကာမဆိုတာ လိုချင်တာမှန်သမျှ ကာမလို့ဆိုကြတယ်လေ...မောင်မောင်၊ မလိုချင်ဘူးလို့ဘယ်အခါမှ ရှိပါ့ မလဲ " " ကဲပါကွယ်...မင်းနဲ့ကျုပ်နဲ့ ၀ါဒချင်းပြိုင်ရအောင် ဒီအခန်းထဲယှဉ်ထိုင်နေကြတာမဟုတ်ပါဘူး၊ ဆေးနည်း ကောင်းကလေးများသာ တတ်နိုင်ရင်ဖော်စပ်ပေးစမ်းပါ " " ရသာယနလို့ခေါ်တဲ့ စားဖွယ်တစ်မျိုးတော့အကျိုးအာနိသင်ရှိတာတွေ့ရပါတယ်၊ ရေမထည့်သော ကျွဲနို့မှ ဖြစ်သောစတုတ္ထနို့ဓမ်းခြောက်ဆယ့်လေးပိုလ်၊ ဖြူသောသကြား သုံးဆယ့်နှစ်ပိုလ်၊ နွားနို့တစ်ရာ့နှစ်ဆယ့်ရှစ် ပိုလ်တို့ကို ရောနှောမွှေနှောက်၍၊ မြေအိုးသစ်အ၀တွင် သန့်ရှင်းစင်ကြယ်သောပိတ်ကိုစည်း၍ နှောပြီးသော ၀တ္ထုစုကို အတန်ငယ်စီယူ၍၊ ပိတ်ပေါ်တွင် လေးညှင်း၊ငရုတ်ကောင်းတို့ကိုမီးသင်း၍၊ ၎င်းအမှုန့်တို့ကို မွှေးရုံ မျှခတ်၊ ပရုတ်လည်းစဉ်းငယ်မျှခတ်၊ ၀သန္တဥတုမှတစ်ပါး အခြားသောဥတု၌ အမြဲစားသုံးအပ်၏ ဟု ဆိုပါ တယ်......မောင်မောင်....." " အင်း.....အကျိုးကကောကွယ်...." " အားကိုဖြစ်စေတတ်၏၊ နွေအခါဖြစ်သော ဂိမှန်ဥတု၊သရဒဥတုတို့၌ နေပူဖြင့် နှိပ်စက်ကုန်သော ခြောက် ကပ်ကုန်သောသူတို့သည်လည်းကောင်း၊ မယားများကုန်သောသူတို့သည်လည်းကောင်းသုံးဆောင်အပ် ကုန်၏လို့ညွှန်းပါတယ်..မောင်မောင်......၊ နောက်ပြီး နွားနို့မှဖြစ်သောထောပတ်သည်လည်း ဉာဏ်ပညာ တင့်တယ်ခြင်း၊ ကျက်သရေရှိခြင်း၊ အိုခြင်း၊ နာခြင်းကိုဖျောက်၍ အသက်ရှည်နိုင်၏လို့ ရသာယန အနေနဲ့ ဆိုပါတယ် " " ကျေးဇူးကြီးပါပေ့ ပညာရှင်မလေးရယ်၊ မောင်မောင်ဒီနေ့ကစပြီး သေရည်ကိုမသုံးတော့ပါဘူး၊ ထောပတ်နဲ့ တကွ အလိုရှိသမျှပစ္စည်းတွေကိုမင်းလက်ထဲအပ်ပါ့မယ်၊ မင်းရဲ့ကိုယ်ပိုင်သီးသန့်ခန်းမှာချက်စပ်၍ ပေးပါ လား.....သီရိမာ " " မောင်မောင် အလိုရှိသမျှ ပေးဆပ်ရမယ့် တာဝန်ရှိသူပါ...သူဋ္ဌေးမင်းရယ် " သူကအမြတ်တနိုးရင်ခွင်တွင်းမှာပွေ့လျက် တင်းတိမ်ကာထားသော သဉ္ဇာလီဘက်သို့ကျွန်မကိုဆောင်ယူ သွားပါသည်။ ထိုအခိုက် တိုက်အောက်ထပ်အိမ်ရှေ့ခန်းဆီမှ ရုတ်ရုတ်သဲသဲမသဲမကွဲအသံကိုကြားလိုက် ခြင်းကြောင့်...... " ဘာသံတွေလဲ မောင်မောင် " ဟုအထိတ်တလန့်မေးမိသည်။ " အိုကွယ်....ဗုဒ္ဓကြွလာချိန်နီးလို့ ဥတ္တရာတို့ပြင်ဆင်ကြတာပေါ့ " ကျွန်မစိတ်ထဲဝယ် ထိတ်ခနဲတော့ဖြစ်သွားပါသည်။ ကိလေသာအာရုံ ကာမဂုဏ်တို့ကို သုတ်သင်တော်မူနေ သောဗုဒ္ဓနှင့်တစ်တိုက်တည်းအတူရှိနေလျက် ကျွန်မမှာတော့ ကိလေသာပွားအောင် ယောက်ျားတစ် ယောက်ကိုအမှောင်ထဲဆွဲသွင်းနေရပါတကား- ဟုရှက်စနိုးဖြစ်နေချိန်တွင် သူကကျွန်မကိုငုံ့၍ပြော လိုက်သည်။ " ဧကဂ္ဂတာ ဆိုတာ တစ်ခုတည်းသောအာရုံလို့ သီရိမာပြောခဲ့ဖူးတယ်နော် "
************************************************************************** နန္ဒသူဋ္ဌေး၏ ရင်ခွင်ထဲရောက်သည်မှာ သီတင်းနှစ်ပတ်ကြာလွန်ခဲ့ပါပြီ။ ရေမိုးသုံးသပ်ရန်၊ နံ့သာခြယ်သရန် အ၀တ်အစားလဲလှယ်ရန် ကျွန်မကိုယ်ပိုင်အခန်းကို နေ့စဉ်ကကဲ့သို့ပြန်လာခဲ့သည့်အခိုက်၊ ယနေ့မှာတော့ ဘာတစ်ခုမှ မယ်မယ်ရရမလုပ်ဖြစ်သေးပဲ ခေါက်တုန့်ခေါက်ပြန် လမ်းသလားရင်းစဉ်းစားနေမိသည်။ သမေဏန သမဏော၊ ဂေါဏေန ဂေါဏော။ မှန်ပါသည်။ ကိလေသာ ခေါင်းပါးသူနှင့်တရားကျင့်သူတို့သည် အပေါင်းအဖော်ဖြစ်နိုင်သကဲ့သို့၊ ရာဂထူ ပြောသည့် နွားသိုးကြိုးပြတ်နှင့် နွားငတ်ရေချတို့မှာ အလွန်အင်ပြေသော မိဿက ဖြစ်နေပါ၏။ နေ့စဉ်နှင့် အမျှ ဗုဒ္ဓဝေယျာဝစ္စဖြင့် အဋ္ဌင်္ဂသီလမြဲနေသော ဥတ္တရာနှင့် ကာမဘောဂီ၊ လောကီဘုံသား နန္ဒတို့ စည်းဝါး မကိုက်ရှေ့သွားနောက်လိုက် မညီသည်မှာ သဘာဝအတိုင်းဖြစ်ပါသည်။ ကျွန်မနှင့်နန္ဒအဖြစ်မှာတော့ သံလိုက်နှင့်အပ်သွားကဲ့သို့ရှိပါသည်။ တစ်ဖက်သား၏ ရမ္မက်အားကို ဖြားယောင်းသွေးဆောင်သိမ်းသွင်းရသည်မှာ ပြည့်တန်ဆာမ၏ လုပ်ငန်းမျှသာဖြစ်၍ သံလိုက်နှင့်ပမာတူ ပါသည်။ သို့သော် သံလိုက်ကမြှူ၍ အပ်သွားကပြေးကပ်သောအခါ ထိုအပ်သွားကို သံလိုက်က ပြန်၍ ဆုတ် ခွာတွန်းလှန်ခြင်းမပြုနိုင်ပေ၊ အငင်အားသာစွမ်း၍ အနှင်အားမစွမ်း၊ အပ်သွားကပ်နေသလောက် သံလိုက်က အကပ်ခံနေရမည်ဖြစ်ပါသည်။ တစ်နည်းဆိုသော် သံလိုက်ကပင် အကွာမခံချင်သည့် သဘာဝဓမ္မ မဟုတ် ပါလော။ ကျွန်မစိတ်ကို ကျွန်မသိပါသည်၊ ကျွန်မ နန္ဒကို တစ်ကယ်နှစ်နှစ်ကာကာချစ်နေမိပါပြီ။ ဥတ္တရာအား ကျွန်မ သစ္စာဖောက်နေပါပကော၊ ယခု ကျွန်မဘ၀ကို ဖောက်လွဲဖောက်ပြန်လုပ်ရမည်လား။ ကျွန်မသစ္စာဖောက်ခြင်းမဟုတ်ပါ၊ အဘယ်ကြောင့်ဆိုသော ပြည့်တန်ဆာအဖြစ်က သာမန်ဇနီးမယားအဖြစ် သို့ တောင့်တလာခြင်းသာဖြစ်ပါသည်။ နန္ဒနှင့်တွေ့လိုက်ခြင်းသည် တကယ့်တကယ်အိမ်ယာတည်ထောင် သည့် လင်ချစ်၊မယားချစ်၊ အချစ်စစ်အချစ်မှန်ကို သရုပ်သကန်ထင်ရှားလာပါသည်။ ဇနီးမယားအဖြစ်၊ သမီး သားတွေကိုချစ်လာချင်ပါသည်။ ကိုယ့်လင်ကိုယ့်သား ကိုယ့်အိုးကိုယ့်အိမ်နှင့်တင့်တင့်တယ်တယ် ထည် ထည်ဝါ၀ါ နေလိုခြင်းမှာ မိန်းမတို့၏ ဓမ္မတာဖြစ်ရာ၊ ပြည့်တန်ဆာစိတ်ထား....ပြည့်တန်ဆာ၏ဘ၀ကို ရွံမုန်း စက်ဆုပ်လာခဲ့ရပါပြီ။ သန့်ရှင်းသော လူ့လောက၀ယ် ပြည့်တန်ဆာ ဟူသည်ကား မလိုလားအပ်သော ဆူးငြောင့်များပါပေ။ ယခု ကျွန်မဖြစ်ရသောဘ၀ကား ကျွန်မရဲ့ကိုယ်ကအများပိုင်ဖြစ်ပါသည်။ ပုဂ္ဂလိက တစ်ဦးတစ်ယောက် အတွက်သာမဟုတ်၊ ရာဂ၏သောင်းကျန်းမှုသည် မေတ္တာ၏ကြင်နာမှုနှင့် ဆီနှင့်ရေ ကွာသလိုကွာကြောင်း ရက်ရှည်ပေါင်းလာရသဖြင့် ကောင်းကောင်းကြီးရိပ်မိရပါတော့သည်။ " ကျွန်မ ဘာလုပ်ရမလဲ၊ ဘာများကော တတ်နိုင်ပါသေးသလဲ " မျက်နှာကို လက်နှစ်ဖက်နှင့်အုပ်၍ တရှုပ်ရှုပ်ငိုချလိုက်မိသည်။ ယောက်ျားတကာ၏ အာသာငမ်းငမ်း စွဲလမ်း တပ်မက်မှုသည် ကိုယ်ပိုင်လင်သား၏ ကရုဏာတရားလောက် လေးလေးပင်ပင်အရသာမရှိပါတကား။ ကျွန်မအားရအောင်ငိုပြီးသည့်နောက် ပြတင်းပေါက်သို့အမှတ်မထင်သွားရပ်နေလိုက်သည်။ ဗုဒ္ဓဝေယျာဝစ္စ ဖြင့် ကျေးကျွန်အမှုထမ်းများအား တပင်တပန်း ပြောဆိုခန့်ခွဲနေသည့် ဥတ္တရာ၏အသံကို ကြားလိုက်ရသည်။ သူ့မှာ ကြည်ကြည်လင်လင်ပျော်ပျော်ပါးပါးနှင့် ကျွန်မရပ်နေရာပြတင်းပေါက်အောက်တည့်တည့်မှာရှိသည်။ ကျွန်မကသူ့ကိုပင် မလိုတမာဖြစ်လာရသည်။ တဏှာပေမနှင့် မဆက်ဆံဘူးထား၊ သူ့မှာအဖိုးတန် လင်ယောက်ျားရှိသေးသည်။ ကျွန်မတွင်ယောက်ျားတွေအများကြီးရှိလျက် လင်အဖြစ်နှင့်တစ်ယောက်မှ မရခဲ့။ နက်ဖြန်ဆယ့်ငါးရက်ပြည့်လျှင် လင်သားကင်းမဲ့သော အိမ်သို့ပြန်၍ စက်ဆုပ်ဖွယ်ဝဲသြဃ၌သာလည်နေရ မည်။ အကယ်၍ ဥတ္တရာသေပြီး..ငါသာ နန္ဒ၏တရားဝင်ဇနီးဖြစ်ရလျှင်............ ဆက်၍ မတွေးဝံ့တော့ပဲ သူ့ကိုကြည့်ရာကမျက်နှာလွှဲလိုက်ရသည်။ ကျွန်မ၏မျက်စိရောက်သွားနေရာကား အခန်းထဲတွင် ရသာယန ဆေးအတွက်ကျိုချက်ထားသော ထောပတ်အိုးဖြစ်သည်။ မီးကျည်းခဲရဲရဲတောက် နေသော မီးဖိုပေါ်တွင်ထောပတ်က ပွက်ပွက်ဆူလျက်ရှိသည်။ တစ်ပိဿာလောက်ရှိသော ကျိုက်ကျိက်ဆူ နေသည့် ထောပတ်အပူသည် လူတစ်ယောက်၏ အသက်ဇီဝကိုတစ်ခဏချင်းဖြုတ်ခြွေနိုင်ကြောင်း ကျွန်မ စဉ်းစားမိလိုက်သည်။ ထိုအခိုက်ကလေးမှာ ဘီလူးသရဲစိတ်ဝင်၍ ဥတ္တရာအား ငုံ့ကြည့်လိုက်ပြန်သည်။ွှဤအခါတွင် ဥတ္တရာက အမှတ်မထင်ကျွန်မကိုမြင်၍ ပြုံးပြလိုက်သည်။ သူ့အပြုံးမှာ အလွန်ကြည်လင်သန့် ရှင်းလှသောကြောင့် ကျွန်မ၏ဦးခေါင်းကို တူနှင့်နှက်သလို ခံစားလိုက်ရသည်။ ကျွန်မအမုန်းကို သူ၏အပြုံး ကတိုက်ခိုက်လိုက်ခြင်းဖြစ်ဟန်တူပါသည်။ " ဒင်းက အခုအထိ ငါ့ကိုအနိုင်ယူထားတုန်းပါကလား " ကျွန်မဘာမှမစဉ်းစားနိုင်တော့ပါ၊ မီးဖိုပေါ်က ကျိုက်ကျိုက်ဆူနေသော ထောပတ်အိုးကို သတိကြီးစွာဖြင့် သယ်ယူလာပြီး ဥတ္တရာခေါင်းပေါ်သို့လောင်းချလိုက်ပါတော့သည်။ " အမယ်လေး...ဘယ့်နှယ်လုပ်လိုက်တာတုန်း " ဟုဝိုင်းအော်ကြသောအသံကို ကြားလိုက်ရပါသည်။ ဥတ္တရာ ၏အသံကိုကား လုံးဝမကြားရတော့။ မကြာခင်တိုက်အတွင်းရှိလူအကုန်ရုတ်ရုတ်သည်းသည်းဖြစ်သွားကြသည်။ တိုက်ပေါ်သို့ပြေးတက်လာကြ သောဆူဆူညံညံအသံတွေကြားရသည်။ ကျွန်မ၏ အခန်းတံခါးကို အတင်းဖွင့်၍ယောက်ျား၊မိန်းမများစွာက ကျွန်မကို ဆွဲထုတ်သွားကြပါသည်။ ဟစ်အော်ဆဲရေး၍ ရိုက်ပုတ်နှိပ်စက်ကြပါသည်။ ကျွန်မ၏ မနောကံ မြန်ဆန်သလောက် ကာယကံကပါသွားပြီးလျှင် ယခုကျွန်မအရိုက်အနှက်ခံရသည့်အခါ မတ္တကလေးအထိ ဘာမျှကြာလိုက်သည်မဟုတ်။ နန္ဒကဘုမသိ၊ဘမသိနှင့်အလန့်တကြား သူ့အခန်းမှထွက်၍တားလိုက်သည်။ " ဟဲ့ - ဟဲ့...သီရိမာကိုဘယ်လိုပြုနေကြတာလဲ " " မဟုတ်ဘူးအရှင့်သား၊ သူ သခင်မကိုထောပတ်ပူတွေနဲ့လောင်းချတယ်၊ သူသေကြောင်းကြံတဲ့မိန်းမယုတ်" " ဟင်.....ဥတ္တရာ..သေရှာပလား " နန္ဒ၏ ကရုဏာအသံသည် ကျွန်မ၏ဘ၀မှန်သို့ချက်ချင်းပြန်ပို့လိုက်ပါသည်။ ငါကား အခစား ပြည့်တန်ဆာ မျှသာဖြစ်၍ ဥတ္တရာကား နန္ဒ၏ ကြင်ရာသက်ထား တရားဝင်ဇနီးမယားပါတကား။ ဇင်္ဂမ မယားက ထာဝရ မယားဖြစ်လိုဖြစ်ငြားပြုမိမှားသည့်တိုင်အောင် နန္ဒ၏မေတ္တာစစ်ကား ငါ့အပေါ်မှာမဟုတ်၊ ဥတ္တရာပင်ဖြစ် ကြောင်းကျွန်မသိရပါလေပြီ။ " ဟဲ့ - ဟဲ့...ငါ့ခင်ပွန်းမကိုအန္တရာယ်အပြုကြပါနဲ့...ဖယ်ကြ..ဖယ်ကြ.." ပြေးဝင်လာသော ဥတ္တရာကိုကြည့်၍ ကျွန်မလန့်၍များပင်သွားသည်။ သူ့တစ်ကိုယ်လုံးမှာ ထောပတ်ပူများ နှင့်ရွှဲစိုနစ်လျက်ရှိသော်လည်း ထိုအပူသည် သူ၏ မေတ္တာရေချမ်းကိုမလွှမ်းနိုင်ကြောင်း ဒိဋ္ဌ တွေ့လိုက်ရ သည်။ အံ့သြဘနန်းပါလား။ ထောင်းထုရိုက်ပုတ်၍ ပျော့ခွေနေသော ကျွန်မကို ဥတ္တရာက ၀င်၍ပွေ့ထူလိုက်သည်။ " သူမတော်တဆပြုမိတာဖြစ်မှာပါကွယ် " ဟုဒေါသဖြစ်နေသောသူများအား နှစ်သိမ့်လိုက်သည်။ " မဟုတ်ဘူး..သခင်မ၊ သူ ကျကျနန လောင်းလိုက်တာ ကျွန်မတို့တွေ့ရတယ် " " ကဲ - ကောင်းပြီ၊ ထားပါတော့၊ ငါ့မှာမှ အန္တရာယ်မဖြစ်ပဲ၊ စိတ်မဆိုးကြပါနဲ့၊ သူ့ကျေးဇူးတွေတို့ခံစားရတယ် မဟုတ်လား၊ သူလာပြီး အရှင့်သားကိုပြုစုဖော်ရလို့ တို့တစ်တွေမှာ ၀ိတက်၊၀ိစာရတွေရှင်းရှင်းနဲ့ ဗုဒ္ဓ ကိုယ်တော်မြတ်ကို ဆွမ်းလုပ်ကျွေးနိုင်ကြတာမဟုတ်လား၊ ကြည့်စမ်းပါဦးကွယ်၊ သူ့ခမျာ ဒဏ်ရာတွေတောင် ရနေပါပြီ " ကျွန်မကိုယ်ပေါ်မှ ဒဏ်ရာဒဏ်ချက်များကိုပင် ကိုယ်တိုင်ဆေးဝါးလိမ်းကျံပေးရှာသည် ။ ဥတ္တရာ၏ အပြုအမူ နှင့်အယုအယတို့သည် ထောင်းထုပုတ်ခတ်သော ဒဏ်ချက်တွေထက် ကျွန်မအသဲကို ၀မ်းနည်းကြေကွဲစေ ပါသည်။ နန္ဒကလည်း ကျွန်မကိုတစ်ချက်ကြည့်၍ အပါးမှလှည့်ထွက်သွားပါပြီ။ ဟုတ်ပါသည်။ သူ့မယား အပေါ်ရက်စက်မှုကြောင့် ကျွန်မကိုစက်ဆုပ်သွားပါပကော။ ကျွန်မ၏ရင်တွင်းဝယ် မဟာသမုဒ္ဒရာက လှိုင်းတံပိုးကြီးများရိုက်ခတ်သလို မိုက်မဲပြစ်မှားမှုနောင်တလှိုင်းလုံး ကြီးများက ရိုက်ခတ်နေပါသည်။ ကျွန်မမျက်ရည်သည် နွေလအခါ ဟိမ၀န္တာမှ ဆီးနှင်းခဲများအရည်ပျော်ကျ သလို ကျခဲ့ရပါပြီ။ " ကျွန်မမှားပါပြီ အစ်မကြီးရယ်၊ သူတော်ကောင်းမကြီးရယ် " " မငိုပါနဲ့ညီမ...မငိုနဲ့၊ ပုထုဇဉ်ဆိုတာ ရာဂပွားသလောက် မှားကြတာပါပဲ " " အစ်မကြီး ကျွန်မအပေါ်မှာခွင့်လွှတ်နိုင်တာ အံ့သြမိပါတယ် အစ်မကြီး " "ညီမလေးကလည်း တစ်နေ့ကျရင် ခွင့်လွှတ်နိုင်တတ်လာပါလိမ့်မယ်ကွယ် " " ကျွန်မကို မုန်းတီးစက်ဆုပ်သွားတော့မှာပေါ့နော် " " ညီမကိုမုန်းလိုက်ရင် ထောပတ်ပူတွေက တစ်ကိုယ်လုံးနှိပ်စက်တော့မှာပေါ့၊ အခုအစ်မကြီးမှာ ဘာမှမဖြစ် တာ ကြည့်ပါလား၊ ဒါဟာ ညီမကိုမမုန်းတဲ့ အထင်ရှားဆုံးသက်သေပါကွယ် " ကျွန်မက သူ့ကိုအားရပါးရဖက်၍ငိုလိုက်ရသည်။ သို့ကလိုမှကျွန်မအပူသက်သာသည်ဟု ထင်ရသည်။ ဆီပူ လောင်းချသူမှာ ကျွန်မဖြစ်သည်၊ ထိုအပူလောင်မြှိုက်ခြင်းခံရသူကား သူမဟုတ်၊ ကျွန်မပင်လျှင်တည်း။ အပြင်ခန္ဓာကိုသာလျှင်မက ကျွန်မ၏နှလုံးသားကို ဆီပူနှင့်အကြော်ခံရသည့်နှယ်။ " ကျွန်မမိုက်ပြစ်ကြီးကို အစ်မကြီးက သည်းခံပေမယ့် အကုသိုလ်က သည်းခံပါတော့မလား၊ ကျွန်မကြောက် လှချည်ရဲ့ " " အကုသိုလ်ကံက သည်းခံနိုင်အောင် အဖဗုဒ္ဓရှိပါတယ်ကွယ်၊ ကိုယ်တော်မြတ်ထံမှာ တောင်းပန်လျှောက် ထားပါ၊ တရားရေအေးတိုက်ကျွေးတော်မူပါလိမ့်မယ် " " ဗုဒ္ဓက ......ဗုဒ္ဓက..ပြည့်တန်ဆာမကို လက်ခံမှာတဲ့လား၊ ကျွန်မရဲ့ဆွမ်းကိုဘုဉ်းပေးမှာတဲ့လား၊ ကျွန်မကို မစက်ဆုပ်မရှောင်ဖယ်ပေဘူးလား၊ ကျွန်မကိုအပြစ်မတင်ပေဘူးလား..အစ်မကြီးရယ် " " မိုက်ပါဘိ..ညီမရယ်၊ ဝေနေယျကို ရင်၌ဖြစ်သောသားကဲ့သို့သနားတော်မူတဲ့ မဟာကရုဏာရှင်ကြီးပါကွယ်၊ မမပြောဖူးတယ်လေ..မေ့သွားပလား၊ ပြည့်တန်ဆာမဖြစ်ခဲ့တဲ့ အမ္ဗပါလီအမျိုးသမီးကိုတောင် ရဟန်းမိန်းမ အဖြစ်လက်ခံတော်မူသေးတာပဲ၊ နောက်ပြီး မမညီမကိုပြောခဲ့တာကော၊ မမကိုယ်စားသူဋ္ဌေးလေးကို လာရောက်ပြုစုတာဟာ ငါ့ညီမအတွက် ကောင်းမှုကုသိုလ် အထောက်အပံ့ဖြစ်ပါလိမ့်မယ်လို့...... ကဲ..ကဲ.. ထ ပါကွယ်...ထပါ.....ထပါ "
************************************************************************* မှန်ပါသည်။ နန္ဒအား သူ့ကိုယ်စားဆောင်ရွက်ပေးမှုက ကျွန်မအတွက် ကုသိုလ်အထောက်အပံ့ဖြစ်ပါလိမ့် မည်ဆိုသော စကားက အမှန်ကြီးမှန်နေပါလေပြီ။ ယခုဗုဒ္ဓမြတ်စွာအားလုပ်ကျွေးရန် ငါးရာသောဆွမ်းပွဲကို ကျွန်မက ဦးဆောင်၍ အခြွေအရံငါးရာဖြင့် ကျွန်မ အိမ်မှတကူးတကသယ်ခဲ့ပါသည်။ သူဋ္ဌေးနန္ဒထံ ခစားရန်လာစဉ်က မြင်းဖြူလေးကောင်..က..သောရထား ပေါင်းချုပ်ကိုစီး၍ လျှပ်ပေါ်လော်လီသည့်စိတ်နှင့် ကိုယ်တွင်မွမ်းမံခြယ်သ လှသထက်လှအောင် မာန ဆောင်လာခြင်းမျိုးဖြစ်သော်လည်း၊ ယခုတစ်ခေါက်မှာကားနှိမ့်ချကျိုးနွံသောစိတ်၊ ၀င့်ဝါတက်ကြွမှုမရှိသော ကိုယ်၊ ပကာသနမဆန်သော အ၀တ်တန်ဆာတို့ဖြင့် ခြေလျင်သာလာခဲ့ခြင်းဖြစ်ရာ တစ်ရက်အတွင်းထူးခြား လာသော မိမိ၏ အဖြစ်ကိုနှစ်ထောင်းအားရကျေနပ်သကဲ့သို့ လမ်းသွားလမ်းလာရာဇဂြိုလ်လူထုကပင် ကျွန်မကိုကြည့်ရင်း ရင်သပ်ရှုမောအံ့သြနေရပါသည်။ ကျွန်မမှာကား ဗုဒ္ဓနှင့်ရင်ဆိုင်ရမည်ကို တထိတ်ထိတ်။ ဥတ္တရာထံရောက်၍ ဆွမ်းပွဲများကို သူ့ကိုအပ်လိုက်ပါသည်။ သူက သာဓုသုံးကြိမ်ခေါ်၍ ကြိုလင့်သည်။ သူ့ မေတ္တာကား တကယ့်အထုအထည်ကြီးမားပါပေသည်။ ကျွန်မအားဆက်ဆံပုံမှာ သူတော်ချင်းချင်း သီတင်း လွေ့လွေ့ပေါင်းဖက်တွေ့လိုက်ရသကဲ့သို့ပင်၊ ထိုအတွက် ကျွန်မတစ်အားတက်ရပါသည်။ မကြာမတင် ငါးရာသော ရဟန်းတို့အား အမှူးပြု၍ ဥတ္တရာ၏ အိမ်ရှေ့ခန်းသို့ကြွလှမ်းဝင်လာသော ဗုဒ္ဓ မြတ်စွာဘုရားအားဖူးမြင်လိုက်ရပါတော့သည်။ လူအပေါင်းက တိတ်ဆိတ်လျက် လက်စုံမိုးနေကြရာ ဗုဒ္ဓ၏ အဆင်းက တိုက်ကြီးခန်းမတစ်ခုလုံးကို အလင်းရောင်ဟပ်လိုက်သကဲ့သို့ရှိပါသည်။ ဗုဒ္ဓ၏ အဆင်းကိုမြင်လျှင် မြင်ချင်း နန္ဒက ကျွန်မကိုပြောသောစကားကိုသွား၍သတိရပါသည် " လှလိုက်တဲ့သီရိမာရယ်၊ ဒီနေ့ဒီရက်အထိ သီရိမာကိုမတွေ့ပဲ နေခဲ့ရတာတော့..ကိုယ့်ကိုကိုယ်တောင် ခွင့် လွှတ်နိုင်ကောင်းစရာမရှိဘူး " ယခုကျွန်မက ကိုယ့်ကိုကိုယ် ကျိန်ဆဲမိပါပြီ။ " ဗုဒ္ဓမြတ်စွာကို ဒီနေ့ဒီရက်အထိ မဖူးတွေ့ပဲနေခဲ့တာတော့ ကိုယ့်ကိုကိုယ်ခွင့်လွှတ်နိုင်ကောင်းစရာ မရှိပါဘူး သီရိမာရယ် " ပြည်သူတို့နှလုံးကို ယူကျုံးဆွဲငင်နိုင်အားရှိသည်ဟုထင်ခဲ့သော ကျွန်မအလှမှာ မြင်သူကို ရာဂဆူပွက်၊ မီး အလျှံတွေတက်စေသော အလှမျှသာဖြစ်ပါသည်။ ဗုဒ္ဓ၏ အဆင်းတော်ကတော့ ဆူပွက်သော မီးလျှံမီး တောက်ကိုပျောက်စေကွယ်စေ၊ ငြိမ်းအေးစေသော ရေကြည်ချမ်းမြ အလှမျိုးပါတကား။ ယခုမှ " အဖဘုရား " ဟုဥတ္တရာက တင်စားခေါ်ဝေါ်ခြင်းကိုသဘောပေါက်ရပါတော့သည်။ ဆရာလိုကြည်ညို ၍၊ ဖအေလိုချစ်ဖွယ်သော ရူပနိကာယ်ပိုင်ရှင်ကြီးပါတကား၊ ထို့ကြောင့် မွေးသဖခင်ကျေးဇူးရှင်၏ မေတ္တာကို ယုံမှတ်အားကိုး ရဲဝံ့စေသကဲ့သို့ ကျွန်မက သံဃအလယ်လူပုံအလယ်တွင် ပြတ်သားရဲဝံ့စွာ လျှောက်ထား လိုက်ပါသည်။ " ဘုန်းတော်အနန္တ အဖရှင်တော်ဘုရား၊ တပည့်တော်မသည် ခင်ပွန်းကောင်းဥတ္တရာအား ယမန်နေ့ကပင် မပြုကောင်း၊မပြုရာ ထောပတ်ဆီပူလောင်း၍ သေကြောင်းကြံခဲ့မိပါသည်ဘုရား၊ ထိုအပြစ်များမှ ချမ်းသာရန် ဘုရားမြတ်စွာအား တပည့်တော်မက နောင်တကြီးစွာဖြင့်လျှောက်ထားခွင့်ပန်ရပါသည် ဘုရား " ဗုဒ္ဓသည် ကျွန်မ၏လျှောက်ထားချက်ကို သည်းခံခွင့်လွှတ်တော်မူကြောင်း ဆိတ်ဆိတ်နေခြင်းဖြင့် ဥပေက္ခာ ပြုတော်မူသည်၊ အတန်ကလေးကြာမှ အင်္ဂါရှစ်ပါးနှင့်ပြည့်စုံတော်မူသော အသံဖြင့်.... " ချစ်သမီး သီရိမာ၊ သူတော်ကောင်းကိုပြစ်မှားခြင်း၌ ကြီးမားသောအပြစ်ရှိသည်ဟု မှတ်လေလော့ " ဗုဒ္ဓက ကျွန်မအား ' ချစ်သမီး' ဟုခေါ်လိုက်ပါသည်။ ဤသို့အခေါ်ခံရခြင်းပင်လျှင် ကျွန်မတစ်ကိုယ်လုံး ကြက်သီးမွေးညှင်းထသွားပါသည်။ ကျွန်မကျေနပ်ပါပြီ။ ကျွန်မဘ၀တစ်လျှောက်လုံး ညစ်ညူးခဲ့သမျှ စိတ်ဓာတ်ကျနေသမျှ ယခုအားရကျေနပ်ပါလေပြီ။ " ချစ်သမီး ဥတ္တရာ၊ သီရိမာသည် ကျိုက်ကျိုက်ဆူသော ထောပတ်နှင့်လောင်းသောကာလ အသို့နှလုံးရှိ သနည်း" ဟုမေးတော်မူလေသည်။ " တပည့်တော်မကား သီရိမာကြောင့် ဒါန၊ သီလကိုပြုခွင့်ရပေသည်၊ ကိုယ်တော်မြတ်ကို ဖူးခွင့်ရပေသည်၊ တရားတော်ကို နာခွင့်ရပေသည်၊ ဤသီရိမာကား ကျေးဇူးရှင်ပေတည်းဟု လွန်စွာချစ်ကြည်သော မေတ္တာ ဓာတ်ဖြင့်သာ ခံနေပါသည်ဘုရား" " သာဓု သာဓု သာဓု ဥတ္တရာ၊ ကြမ်းကြုတ်ခက်ထက်စောင်းမာန်အမျက်ကြီးသူကို အမျက်မရှိခြင်းဖြင့် အောင်နိုင်ရာ၏၊ သူတော်မဟုတ် အကျင့်ယုတ်သူကို သူတော်အကျင့်ဖြင့် အောင်နိုင်ရာ၏၊ ၀န်တိုစဉ်းလဲ စေးနှဲသူကို စွန့်ကြဲပေးကမ်းလှူဒါန်းခြင်းဖြင့် အောင်နိုင်ရာ၏၊ ချွတ်လွဲဖောက်ပြန် မမှန်စကားဆိုသူကို သစ္စာ စကားဖြင့် အောင်နိုင်ရာ၏ " ကျွန်မသည် မျက်ရည်တတွေတွေကျသည်အထိ ပီတိအဖြစ်ကြီးဖြစ်ရပါသည်။ ဤမျှသော တရားအစုဖြင့်ပင် ကျွန်မစိတ်ကိုကျွန်မလှစ်ခနဲသိလိုက်ပါသည်။ အယူအဆအလွဲအများတို့ကို ဒိဋ္ဌသိလိုက်ခြင်းနှင့် မြွေသတ္တ၀ါ ကဲ့သို့ အဟောင်းကို ကွင်းလုံးကျွတ်စွန့်ခြင်းဖြင့် သိမ့်ခနဲတုန်သွားပါသည်။ မြတ်စွာဗုဒ္ဓ၏ တစ်ခုတည်းသောတရားကို ပိုင်နိုင်ရဲရင့်စွာ သုံးသပ်နိုင်လိုက်သည်။ ထိုမှတစ်ပါးသောယုံကြည် အပ်သောတရားသည် အဘယ်မှာမှ မရှိဟု ပြတ်ပြတ်သားသားသိလိုက်ပါပြီ။ ကျွန်မ၏စိတ်မှာ ဓမ္မအရသာကို သန့်ရှင်းစင်ကြယ်တိကျစွာမြူးကွန့်ကျက်စားနေပါသည်။ နေရောင်ဟပ် သော ထက်ကောင်းကင်က တိမ်ဖြူလွလွသည် အဆုံးအစမရှိ ပကတိဖြူဆွတ်ပေါ့ပါးနေသည့်အလားပင်။ " သာဓု သာဓု သာဓု သီရိမာ၊ သင်ချစ်သမီးကား အရိယာမဂ်အယဉ်သို့ ပထမအဆင့်ဆိုက်ရောက်ခိုဝင်ပြီး ဖြစ်ပေပြီ " ဗုဒ္ဓ၏စကားသည် ဥတ္တရာတို့တိုက်ကြီးတစ်ခုလုံး ဥက္ကောဋေယျ လှုပ်လှုပ်ရွရွ ဖြစ်သွားကြောင်း ကျွန်မ ကောင်းကောင်းသတိထားလိုက်မိပါတော့သတည်း။ ကျွန်မမျက်ရည်ကား ရွှဲရွဲစိုလျက်။ (နန္ဒမာတာဥတ္တရာ ထေရီအပဒါန်)
Credit - စာရေးဆရာကြီး (ဦး)သုခ ၏ အကျော်ဒေးယျဗုဒ္ဓသမီးတော်များ စာအုပ်ထဲမှ " ပြည့်တန်ဆာမကလေး" ဆိုသောအပုဒ်ကိုပြန်လည်ရိုက်နှိပ်ဖော်ပြခြင်းဖြစ်ပါသည်။
စာလုံးပေါင်းမှားယွင်း မှုရှိခဲ့ပါက..ထိုအမှားသည် မူရင်းစာရေးဆရာနှင့်လုံးဝမသက်ဆိုင်ပဲ..ကျွန်ပ်၏အမှားသာဖြစ်ပါမည်။
အားလုံးကိုချစ်ခင်လေးစားစွာဖြင့်
**တွတ်တွတ်**
No comments:
Post a Comment